بنګله ديشي چارواکو وویل چې د زلزلې ټکانونه په شرقي ایالتونو کې چې هند سره په سرحد کې پراته دي هم احساس شوي، خو په سملاسي توګه هلته د لويو زیانونو د اوښتو څه نه دي ویل شوي.
د بنګله دېش د موقت حکومت مشر محمد یونس په یوه اعلامیه کې ویلي په زلزله کې د ټپي شوو کسانو په ډله کې د ډهاکې پوهتون محصلین، په قاضي پور ښار کې د فابريکو کارګران او د نارسینګدي، اوسېدونکي دي. نارسينګدي د زلزلې مرکز ښودل شوی چې د ډهاکې ختيځ ته په نژدې ۴۰ کیلومترۍ کې واقع ده.
په اعلامیه کې د مړه شوو کسانو په هکله وضاحت نه دی ورکړل شوی.
یوې روغتیاپالې، نورجهان بیګم، خبریالانو ته وویل چې له نارسينګدي څخه ګڼ شمېر ټپیان روغتون ته انتقال شوي چې د ځینو روغتيايي وضعیت نازک دی.
پولیسو په ابتدا کې د درو کسانو د مړېنې خبر ورکړی وو چې د زلزلې پر مهال د یو شپږ پوړیز ساختمان د خوازو د رالوېدو پر وخت مړه شوي دي.
په ډهاکه کې د رويټرز خبري آژانس خبریال د خپلو سترګو لیدلی حال بیان کړی او وايي چې د ښار اوسېدونکي په داسې حال کې له خپلو کورنو تېښتې کولې چې ځواکمنې زلزلې ساختمانونو ته ټکانونه ورکول او ځینې ېې رانړېدل.
ځايي اوسېدونکي سومن رحمن وویل: «موږ یو قوي ټکان احساس کړ او ساختمانونه د ونو په څېر ښورېدل. په داسې حال چې خلکو په زينو کې د ښکته کېدو پر مهال رش جوړ کړی و، ځينو له پاسه ځانونه لاندې واچول او ماشومانو ژړل.»
ورته نور ولولۍ:
د اطفائيې ادارې ويلي یو شمېر کسان تر کار لاندې ساختمانونو له پاسه غورځېدلو خښتو او سمنټو ټپیان کړي دي.
په ډهاکه کې یو کارګر وویل: «ما په ژوند کې داسې ټکان نه وو لیدلي... موږ په منډه په زینو کې لاندې سړک ته کوز شولو او هلته له موږ مخکې نور خلک هم راوتلي ول.»
د یونس د دفتر له خوا په خپره شوې اعلاميه کې زیاته شوې چې چارواکي وضعیت له نژدې څاري او اړوندو ادارو ته سپارښتنه شوې چې په زیانمنو شوو علاقو کې د نجات عملیات چټک کړي.
د افغانستان په شمال کې د مرگونې زلزلې ویجاړۍ په انځورونو کي
د ریشتر په مقیاس ۶،۳ درجې شدت سره زلزلې د دوشنبې په شپه د افغانستان شمال ولړزاوه. د طالبانو ادارې د عامې روغتیا وزارت د لومړیو شمیرو له مخې ددغې پیښې له امله ۲۰ کسان مړه سوي او څه د پاسه ۵۰۰ نور زخمیان سوي دي.
انځور: Afghan Red Crescent/REUTERSد طالبانو د ادارې یوه ویاند ویلي دي چې د بلخ، بغلان او سمنگان ولایتونه د هغو سیمو له ډلې څخه دي چې ډیر زیان یې لیدلی دی. د هغه په خبره ډیری ځايي اوسیدونکي د زلزلې د رامنځته کیدو پروخت بیده ول او وې نه سوای کولای چې له خپلو کورونو څخه ووزي.
تر ویجاړیو لاندې د ممکنه بند پاته سوو کسانو د ژغورنې له پاره هلې ځلې
د طالبانو ادارې ویلي دي چې ژغورونکي ټیمونه له کابل او نورو ولایتونو له مرکزونو څخه له هغو کسانوسره د مرستې له پاره استول سوي دي چې ښايی په غرنیو سیمو کې تر ویجاړیو لاندې بند پاته وي. خپاره سوي انځورونه ښيی چې خلک په ابتدايی وسایلو لکه یوم او کلنگ سره له ویجاړیو څخه د خلکو د ژغورنې په هڅه کې دي.
د طالبانو ادارې له طبیعي پیښو سره د مبارزې د ادارې ویاند، یوسف حماد اعلان کړی دی چې د زلزلې له امله ډیرو زخمیانو سرسري ټپونه لرل او له لومړنیو درملنو وروسته بیرته رخصت سول. همدارنگه د طالبانو د ادارې د دفاع وزارت اعلان کړی دی چې ژغورونکي ټیمونه د نورو ترڅنگ ، د درملنې مرکزونو ته د زخمیانو د انتقال او زیانمنو کورنیو سره د مرستې له پاره بلخ او سمنگان ته تللي دي.
د طالبانو د ادارې د عامې روغتیا وزارت ویاند، شرافت زمان اعلان وکړ چې امکان لري د تلفاتو شمیر زیات سي. دغې زلزلې د بلخ او سمنگان په ولایتونو کې پر ځاني تلفاتو سربیره، ډیر مالي تلفات هم له ځانه پرې ایښي دي. د دغې پیښې د تلفاتو او زیانونو کچه تر اوسه لا معلومه نه ده.
د ۲۸ کیلومتره په ژوره یوه زلزله
د امریکا متحده ایالاتو د مځکې پیژندنې سازمان اعلان کړی دی چې د دغې زلزلې مرکز د بلخ په شمالي ولایت کې د مځکې په ۲۸ کیلومتره ژوره کې و. د دغې پیښې یو شمیر زخمیان د خلکو او ژغورنې د ټیم په مرسته روغتیايي مرکزونو ته انتقال سوي دي.
د حضرت علی د زیارت ممکنه زیان رسیدل
د طلوع نیوز د تلویزیوني شبکې له خوا خپاره سوي انځورونه ښيی چې په مزار شریف کې د حضرت علي یا سخي زیارت په نوم مشهور جومات زیانمن سوی دی.
زیانمن سوو کسانو ته د مرستې له پاره هلې ځلې
د طالبانو د ادارې ویاند ذبیحالله مجاهد، د ایکس پر شبکه یوه پوست کې اعلان وکړ چې زلزلې د بلخ، سمنگان او بغلان ولایتونه لړزولي دي او ځاني او مالي تلفات یې اړولي دي. هغه د خواشینۍ او خواخوږۍ په څرگندولو سره وویل چې اړونده دولتي بنسټونه هڅه کوي ترڅو لازمې مرستې زیانمن سوو کسانو ته ورسوي.
د وارداتي بریښنا د پایو تخریب
د افغانستان د بریښنا شرکت رپوټ ورکړی دی چې د تیرې شپې زلزلې د بریښنا پايې تخریب کړي او په کابل او څو نورو ولایتونو کې د بریښنا د قطع کیدو سبب سوي دي. دغه شرکت اعلان کړی دی چې هغه دواړې پايې چې له ازبکستان او تاجکستان څخه یې وارداتي بریښنا انتقالوله ، تخریب سوي دي.
افغانستان په تکرار سره د مرگونو زلزلو شاهد دی
په افغانستان کې په وروستیو کلونو کې زلزلې د لنډ وخت په ترڅ او په ډیر شدت سره رامنځته کیږي. د ۲۰۲۳ م کال په وروستیو کې په هرات ولایت کې یوه سخته زلزله له څو نورو کوچنیو زلزلو سره رامنځته سوه چې په نتیجه کې یې، د طالبانو د ادارې د احصایې له مخې ، شاوخوا ۱۲۰۰ کسانو خپل ژوند له لاسه ورکړ او نور په سلونو کسان زخمیان سول.
