دا غوښتنه د امریکا متحده ایالاتو د ولسمشر دونالد ټرمپ د ذهني وړتیا په اړه نوي پوښتنې راپورته کوي، په داسې حال کې چې په واشنګټن کې د ملي ګارډ د دوو سرتېرو پر وړاندې برید سیاسي تشنج زیات کړی دی.

د امریکا د مېنېسوټا ایالت والي د امریکا د ولسمشر ډونالډ ټرمپ له لفظي برید وروسته سخت غبرګون ښودلی دی.

ډیموکرات ټيم والـز د جمعې په ورځ (د ۲۰۲۵ کال د نوامبر ۲۸مه) په ټولنیز پلیټفارم «ایکس» کې غوښتنه وکړه چې د جمهوري غوښتونکي ولسمشر د مقناطیسي ریزونانس انځور ‌اخیستنې «MRI» پایلې دې خپرې شي چې په دې سره یې د ټرمپ ذهني وړتیا په غير مستقيمته توګه تر پوښتنې لاندې راوسته.

د «MRI» معاينې په ترڅ کې د بدن د داخلي جوړښت انځورونه اخيستل کيږي چې د بندونو زیان، د زړه حمله یا تومورونه پکښې څرګندېدلای شي. ټرمپ د اکتوبر په پای کې ویلي وو چې د هغه د «MRI» معاینه شوې ده. د ۷۹ کلن ولسمشر په وینا، پایلې یې «کاملې» وې، خو خپرې شوې نه دي چې همدغه نه خپرونې د دا ډول انځورونو په هکله د احتمالي څرګندونو اوازې زیاتې کړي دي.

د والـز او ټرمپ ترمنځ شخړه هغه مهال راپورته شوه چې ولسمشر په خپل پلټفارم «ټروت سوشل» کې یوه تنده لیکنه خپره کړه. په دې لیکنه کې هغه په امریکا کې مېشت د «ناکامو هېوادونو» خلک په ټولیزه توګه په جرمونو تورن کړي او والـز یې هم توهین کړی دی.

د واشنګټن د برید په اړه د امریکا حکومت توند غبرګون

دا شخړه په داسې حال کې رامنځته کېږي چې په واشنګټن کې د ملي ګارد پر دوو غړو برید وشو چې له امله یې يوه ښځينه سرتېرې ووژل شوه او بله سخته ټپي په روغتون کې بستر ده.

په ځواب کې د ټرمپ ادارې هغه کسان په نښه کولو لپاره سخت اقدامات اعلان کړل چې له افغانستانه راغلي، يعنې له هغه هېواده چې شکمن برید کوونکی يې تابعيت لرونکی دی. د افغان کډوالو هراړخیزې څېړنې پلان شوې دي او پام د هغو هېوادونو خلکو ته هم اوښتی چې لا هم په جګړو او ناامنۍ کې دي.

د بشري حقونو سازمانونو خبرداری ورکړی چې د یوه کس عمل باید د ټول ملت یا خلکو د بدنامولو لپاره ونه کارول شي.