چارواکو د دوشنبې په ورځ وويل چې د امريکا متحده ايالاتو د ميشيګن ايالت د يوه پوهنتون په ساحه کې د ډزو په ترڅ کې درې کسان وژل شوي او پنځه کسان په سخت ټپي حالت کې روغتون ته انتقال کړل شوي دي. پوليسو ويلي دي چې د ځينو ټپيانو روغتيایي وضعيت د انديښنې وړ دی.
د پوليسو د معلوماتو په حواله پېښه د سيمې پر وخت د دوشنبې په ماښام د ميشيګن ايالتي پوهنتون په ساحه کې چې په لانسنګ سيمه کې پروت دی، رامنځته شوې ده. ويل شوي چې د پوهنتون په ساحه کې په دوو ځایونو کې فايرونه شوي دي.
اړونده موضوع:کالیفورنیا: په ډزو کې ۷ کسان وژل شوي
د پېښې پر وخت د پوهنتون په ساحه کې له موجود خلکو ژر تر ژره له ساحې څخه د وتلو غوښتنه شوې وه. د پوهنتون محصلينو، استادانو او نورو کارکوونکو ته د لومړي خبرداری په ترڅ کې لارښوونه شوې وه چې «وتښتي، ځانونه پټ کړي او يا جګړه وکړي.»
په دې لومړۍ اعلاميه کې له خلکو دا هم غوښتل شوي ول چې که د تېښتې او يا ځان پټولو امکان نه وي نو بيا د ځان څخه د دفاع هڅه وکړي. د پوهنتون يو شمير ودانۍ تخليه کړل شوې وې او د سيمه ایزو رسنيو په ويديوګانو کې ليدل کیږي چې څرنګه پوليس د پېښې ځای ته داخليږي.
پوليسو ويلي دي چې د احتمالي بريدګر مخ پټ وو او د باسکټبال خولۍ یې پر سر وه. تر ډزو وروسته هغه په تېښته بريالی شوی وو، خو تر تېښتې لږ وروسته يې ځان پخپله په ډزو وژلی دی.
اړونده موضوع:د امريکا په يوه ښوونځي کې ۲۱ کسان په ډزو وژل شوي
سيمه ایزو رسنیو هم ویلي دي چې شکمن عامل وژل شوی خو د انګیزې په اړه یې تر اوسه معلومات نه دي په ډاګه شوي.
په امريکا کې تل د فايرونو دا ډول پېښې رامنځته کیږي چې زيات وخت يې د ښوونځي زده کوونکي او يا د پوهنتون محصلين هدف ګرځي.
د لانسنګ سيمه د ديتروېد څخه ۱۴۵ کيلومتره شمال لوېديځ ته پرته ده. هلته پروت دا پوهنتون د خپلې انترنټ پاڼې د معلوماتو پر اساس تر۵۰ زرو ډېر محصلين لري. د پوهنتون ټولټال ساحه تر ۲۱ مربع کیلومترو هم پراخه ده.
ب. ص/ ن. ز (ap, dpa, rtr, afp)
زموږ له آرشيف څخه:
د لاس ویګاس پیښه: تر اوسه څه معلوم شوي
په لاس ویګلاس کې د یوه کنسرت پر مهال ډزې شوې دي چې له کبله یې لوړه مرګ ژوبله رامنځ ته شوې ده. د وژل شویو کسانو په ډله کې پخپله بریدکوونکی هم شامل دی. پولیسو اوس د پیښې سیمه کلا بند کړې ده.
انځور: Reuters/Las Vegas Sun/S. Marcusپولیس وایي چې په لاس ویګاس کې د ډزو له کبله لږ تر لږه ۵۰ تنه وژل شوي او په سونو تنه نور بیا ټپیان دي. پولیسو ته مندالي بې کازینو ته نزدې د یوه برید کوونکي په اړه خبر ورکړل شوی وو.
خلک د کنسرت له سیمې د تیښتې په حال کې
د لاس ویګاس پولیسو له خلکو څخه وغوښتل چې له سیمې وتښتې او یا خو هلته هیڅ ولاړ نه شي. پولیسو همداراز سیمې ته رسیدونکي واټونه هم تړلي ول. پولیسو ویلي دي چې له سیمې څخه یې اتوماتې وسلې ډزې اوریدلې دي.
ډیری کسان ټپیان دي، د مړو شمیر ډیر لوړ شوی
د لاس ویګاس د پولیسو مشر جو لمباردو، خبریالانو ته وویل چې د وژل شویو کسانو شمیر لږ تر لږه ۵۰ دي. هغه وویل چې له ۲۰۰ څخه ډیر کسان ټپیان شوي هم دي.
لومباردو ویلي دي چې ډزې کوونکي د مندالي بې هوټل د دریم منزل د یوې خونې له کړکۍ څخه د کنسرت پر لیدونکو باندې ډزې پیل کړې دي. پولیسو بیا وروسته په همدې سیمه کې برید کوونکی وواژه. برید کوونکي د یوه ځايي اوسیدونکي په توګه معرفي شوی دی خو نوم یې لا نه دی ښوول شوی.
په داسې حال کې چې پولیس وایي په دې باور دي چې برید کوونکي په یوازې سر عمل کړی وو، خو لومباردو روښانه کړې ده چې اوس چارواکي د بریدګر د هم اطاقي په لټه کې دي چې ورڅخه پوښتنې وکړي. پولیس همداراز د برید کوونکي دوه موټره هم لټوي.
ډیر شمیر پولیس چې په کار کې نه وو، هم د کنسرت په لیدونکو کې شامل وو. د هغوی له ډلې څخه دوه تنه یې وژل شوي دي. د پیښې پر مهال سندرغاړي جیسن الدیان، سندرې ویلي. هغه پر خپله ټولنیزه پاټه لیکلي دي چې د قربانیان په فکر دی او دغه پیښه کې یې ډیره ویروونکې بللې ده.
د امریکا په تاریخ کې تر ټولو وژونکې د ډزو پیښه
له۵۰ څخه زیاتو قربانیانو سره، د لاس ویګاس پیښه د امریکا متحده ایالاتو په تاریخ کې تر ټولو وژونکې د ډزې پیښه ده.
