د «واشنګټن پوسټ» د راپور له مخې، د امریکا حکومت میلیونونه صادر شوي ویزې بیا څېړي. د دې لپاره ټول هغه معلومات کارول کېږي چې د ویزې له ورکولو وروسته څرګند شي، په شمول د ټولنیزو شبکو فعالیتونو. راپور زیاتوي چې شاوخوا ۵۵ میلیونه کسان تر دې څېړنې لاندې دي.

د «پرله ‌پسې بیاکتنې» له لارې کېدای شي ویزې هغه وخت لغوه شي چې د استوګنې د مودې د غځولو یا د جرمونو په اړه کومې نښې ولیدل شي. «واشنګټن پوسټ» دا یوه «د پخوانیو اقداماتو د پام وړ پراخوالی» وباله. د بهرنیو چارو وزارت یوه لوړپوړي چارواکي هم ورځپاڼې ته تایید کړې چې «اوس تر هر وخت ډېر معلومات» راټولېږي، خو دا لا روښانه نه ده چې دغه زيات وخت نيوونکې او له لوژستیکي پلوه پېچلې څېړنه به په عمل کې څنګه ترسره کېږي.

دغه هم ولولئ: امريکا ته د ۱۲ هيوادونو پر اتباعو باندي د داخلیدو بشپړ بندیز نافذ سو

د تبعیض خبرداری

«واشنګټن پوسټ» ليکي چې دا نوې خبره نه ده چې ویزې د قانون د پلي کوونکو ادارو د تماس پر مهال بیا څېړل کېږي.  د «کټو انسټیټیوټ» د فکر د مرکز د کډوالۍ کارپوه ډېوېډ جې بییر ويلي چې د بهرنیو چارو وزارت وروستی اعلان داسې ښکاري لکه چې «ویزې د چلند پر ځای د څرګندونو پر بنسټ لغوه شي». هغه خبرداری ورکړ چې دا ډول څېړنې «په تبعیض کوونکي ډول ترسره کېدای شي» او ښايي د «ځانګړي شالید لرونکو کډوالو» پر وړاندې وکارول او د هغوی د شړلو لپاره پلمه جوړه شي.

د ټرمپ تګلاره

د امریکا ولسمشرډونالډ ټرمپ غواړي پر هغو کډوالو کلک فشار راوړي چې په ناقانونه توګه هېواد ته داخل شوي یا بې له قانوني استوګنې په امریکا کې اوسېږي. خو هغه کسان هم چې په قانوني ویزه امریکا ته ننوځي، تر سختې څارنې لاندې نیول کېږي.

د امریکا د کډوالۍ او تابعیت ادارې (USCIS) تازه اعلان وکړ چې دا به هم وڅېړل شي چې ايا کډوال پر انټرنېټ «د امریکا ضد» احتمالي څرګندونې کړي که نه. د سیلانیانو او محصلینو ویزې هم په زیاتېدونکي ډول تر څېړنې لاندې نیول کېږي.