د پولیسو په حواله دغه پيښه پرون شنبه (د مارچ میاشتي ۲۷ مه) رامنځته اوعامل یې هم نیول سوی دی. خو هغوی د زخمیانو د حالت او د برید کونکي د انګیزې په باب معلومات ورنکړل.
د پولیسو یوه ویاند دغه حمله « کاملأ ټکان ورکوونکې» بللې ده. د عیني شاهدانو په حواله مجرم په اصطلاح په «پټو سترګو او بې هدفه» خلک په چړو وهلي دي. یوې عیني شاهدي، شیلا دایسن د کاناډا ټلویزوني چینل، CTV ته وویل، چي مجرم خپل قربانیان نه پیژندل او د عامو خلکو په منځ کي ورګډ سو.
دغه حمله پرون شنبه تر غرمې وروسته د وینکوور په عامه کتابخانه او د هغې په شاوخوا کي تر سره سوه. پولیسو ویلي دي، چي برید کونکي په یوازي سر عمل کړی دی او څوک ورسره ملګري نه وه.
ژغورونکې عملې بیا د ۶ تنو د زخمي کیدو خبره کړې ده. د دغه ښار د جنايي پولیسو د آمریت څخه فرانک یانګ وروسته وویل، چي یو کس د خپلو زخمونو څخه مړ سو. هغه دا هم وویل، چي د وژل سوي کس هویت تر اوسه پوري معلوم سوی ندی: «دا زموږ ټولو دپاره او هم د پولیسو د پاره یو شوک دی.»
په همدې حال کي د کاناډا ټلویزوني چینل، CTV د بریدکونکي د نیولو یوه ویډیو ښکاره کړې ده. په ویډیو کي ښکاري، مخکي تردې چي هغه ونیول سي، خپله پښه هم په چاړه وهي. هغه هم بیا روغتون ته انتقال سو.
پر عبادتځایونو د خونړیو بریدونو پېښې
په ټوله نړۍ کې په تیرو څو کلونو کې پر یو شمیر عباتځایونو او مذهبي ځایونو بریدونه شوي دي. پر مسجدونو، کلیساوو او د یهودانو پر عبادتځایونو د ځینو خونړیو پيښو لنډ جزئیات د انځورونو په دې ګالرۍ کې لیدلی شئ. انځور: Reuters/J. Silva د کرایسټ چرچ په ښار کې پر مسجدونو یرغل د نوي زیلنډ په کرایسټ چرچ ښار کې پر دوو مسجدونو د فیرونو په پېښه کې ۵۱ مسلمانان ووژل شول او تر۵۰ زیات ټپیان شول. بریدګر برینټن ټیرنټ، د ۲۰۱۹م کال د مارچ پر ۱۵مه نېټه په دغه ښار کې په النور مسجد کې د جمعې د لمانځه پر مهال پر عبادت کوونکو ډزې کړې وې. دغه خونړۍ پيښه هغه د فیسبوک پر ټولنیزه پاڼه په ژوندۍ بڼه خپروله. اوس د دغه برید ګر محاکمه جریان لري.
انځور: picture-alliance/NurPhoto/S. Vidanagama امریکا متحده ایالات: د یهودانو د «هنوکا» پر مذهبي مراسمو برید له نیویارک څخه کابو د یوه ساعت په واټن کې د مونسې په سیمه کې ډیر شمیر ارتودوکس یهودان مېشت دي. د ۲۰۱۹م کال په دسمبر میاشت کې د یهودانو د یوه راهب په کور کې یو کس پنځه تنه په چړې ټپیان کړل. د نیویارک چارواکو د کرکې انګیزه لرونکی دغه برید سخت وغانده.
انځور: Reuters/E. Munoz آلمان: د یهودانو پر عبادتځای حمله د تیر میلادي کال په اکتوبر میاشت کې د آلمان د زاکسن انهالت ایالت په هاله ښار کې د یهودانو یوه عبادتځای ته یوه وسله وال بریدګر د ننوتو ناکامه هڅه وکړه. دا چې بریدګر ودانۍ ته په ورننوتلو ونه توانید دغه ځای ته څیرمه پرتې هدیره کې يې یوه ښځه په ډزو ووژله. دغه مهال په کنیسه کې د یهودانو د «یوم کيپور» په مذهبي مراسمو کې اتیا کسانو ګډون درلود.
انځور: DW/B. Knight افغانستان: په ننګرهار کې په یوه مسجد کې خونړی برید د ۲۰۱۹م کال په اکتوبر میاشت کې د ننګرهار ولایت د هسکه مېنه ولسوالۍ په جودرې کې په یوه مسجد کې د جمعې د لمانځه پر مهال د چاودنې له کبله تر ۶۰ زیات کسان ووژل شول. د چاودنې پر مهال د مسجد دننه شا او خوا ۲۵۰ کسان ول. په پيښه کې په لسونو کسان ټپیان هم شول.
انځور: Reuters/O. Sobhani سریلانکا: په کلیساوو کې چاودنې تیر میلادي کال په سریلانکا کې د عیسویانو د ایستر اختر پر مهال پر درو کلیساوو او درو هوټلونو باندې د سخت دریځه اسلامپالو له لوري د ځانمرګو بریدونو د لړۍ په ترڅ کې ۲۶۰ کسان ووژل شول. ځایي تندلارو په دوو کاتولیک او یوې پروتستنات کلیسا کې ځانمرګي بریدونه وکړل چې ډیر ماشومان پکې هم ووژل شول.
انځور: picture-alliance/AP Photo/E. Jayawardena کالفورنیا: په کنیسه کې فیرونه د سریلانکا تر بریدونو یوه اوونۍ وروسته د امریکا متحده ایالاتو په کالفورنیا ایالت کې د یهودانو پر یوه عبادتځای باندې د فیرونو په پایله کې یوه ښځه ووژل شوه. ۱۹ کلن سپین پوستی شکمن بریدګر ونیول شو.
انځور: picture-alliance/AP Photo/D. Poroy تایلنډ: د بودایانو پر عبادتځای باندی حمله د ۲۰۱۹م کال په جنورۍ میاشت کې د تایلنډ په سویلي ایالت نارتهیوات کې وسله وال بیلتون غوښتونکي د بودانو یوه عبادتځای ته ورننوتل او فیرونه یې وکړل. په رتناو پاپ، نومې عبادتځای کې په دغه پېښه کې دوه کسان ووژل شول.
انځور: Reuters/S. Boonthanom په فلیپین کې پر کلیسا تر برید وروسته پر مسجد حمله د فلیپین په سویل کې د ۲۰۱۹م کال د جنورۍ میاشتې پر ۳۰مه نېټه پر مسجد باندې په یوه برید کې دوه کسان ووژل شول. دغه برید د یوه لاسي بم په واسطه شوی وو. د جنورۍ پر ۲۷مه نېټه پر یوه کلیسا هم یو خونړی برید شوی وو. د دغه برید په ترڅ کې د کاتولیک مسیحانو یوه کلیسا په نخښه شوې وه. په دغه چاودنه کې ۲۳ تنه وژل شوي او سل نور ټپيان شوي ول.
انځور: picture alliance/dpa/AP/WestMinCom Armed Forces of the Philippines د هند په پنجاب ایالت کې پر درمسال برید د هند په شمال کې د سکانو پر یوه عبادتځای باندې د لاسي بمونو د برید په پایله کې درې کسان ووژل شول او په لسونو نور ټپیان شول. دغه پېښه د ۲۰۱۸م کال په نومبر میاشت کې د هند د پنجاب ایالت په یوه کلي کې رامنځ ته شوې وه. د حملې پر مهال په ګوردواره یا درمسال کې په سلونو عبادت کوونکو حضور درلود.
انځور: N. Nanu/AFP/Getty Images امریکا متحده ایالات، پېنسلوینیا د ۲۰۱۸م کال په اکتوبر میاشت کې د امریکا متحده ایالاتو د پېنسلوینیا په پېتسبرګ، نومې ښار کې د یهوادنو پر یوه کنیسه باندې د برید په پایله کې ۱۱ کسان ووژل شول.
انځور: picture-alliance/dpa/M. Rourke په پاکستان کې د احمدیانو پر عبادتځای برید د ۲۰۱۸م کال په اګست میاشت کې د پاکستان د پنجاب ایالت فیصل آباد ښار ته څیرمه په یوه کلي کې خلکو د احمدیانو پر یوه عبادتځای هجوم وروړ او شپږ کسان یې ټپیان کړل. په پاکستان کې په متواتر ډول پر احمدي ټولنې بریدونه کیږي. د پاکستان پارلمان په ۱۹۷۴م کال کې احمدیان د غیرمسلمان اقلیت په توګه اعلان کړي وو.
انځور: Reuters/S. Sayeed د ۲۰۱۷م کال په اکتوبر میاشت کې په کابل کې د شیعه مسلمانانو په مسجد کې د یوه ځانمرګي برید په پایله کې ۳۹ کسان ووژل شول او تر ۴۱ زیات ټپیان شول. د بريد پړه داعش ترهګرې ډلې پر غاړه واخيستله.
انځور: picture-alliance/Zumapress/R. Alizadah
