د آلمان خبري آژانس په حواله، د اتريش د کورنيو چارو وزير، کارل نهامينر خبريالانو ته ويلي دی چې په وژل شوو کسانو کې دوه نارينه او يوه ښځه شامل دي. هغه زياته کړې چې يو بريدګر چې په وسله سمبال او د ځان وژونکي بريد يو جعلي واسکټ يې اغوستلی وو، هم د پوليسو په ډزو کې وژل شوی دی. زياته شوې چې په پېښه کې د يوه پولیس په ګډون پنځه تنه نور ټپيان شوي هم دي.
نوموړي وزير وويل، لومړني تحقیقات ښيي چې وژل شوي بريدګر له اسلامي دولت يا داعش ډلې سره همدردي درلوده. نهامنير خبريالانو ته وويل: «بريدګر د اسلامي دولت له تروريستي وسلوالې ډلې سره همدردي درلودل.» خو هغه په دې اړه د ډيرو جزئياتو له ورکړې څخه ډډه وکړه او وې ويل چې په اړه يې تحقیقات ادامه لري.
د لومړنيو رپوټونو په حواله، د اتريش د کورنيو چارو وزير ويلي وو: «داسې ښکاري چې دا یوه تروريستي حمله وي.» کارل نیهامر د اتریش حکومتي تلويزيون ته وويل چې حمله کونکي په وسلول سمبال ول.
د اتريش چارواکي وايي د دې احتمال شته چې نور وسلوال په تيښته بريالي شوي وي، چې په اړه يې لټون ادامه لري. په ویانا کې پوليسو له خلکو غوښتي چې نن سه شبنې په خپلو کورنو کې پاتې شي.
انځور: Alex Halada/AFP/Getty Images د پولیسو په خبره دغه وسلواله حمله د ښار په مرکزي سیمه، د ګوڼې ګوڼې په يوه کوڅه کې شوې او له شپږو مختلفو ځايونو څخه ډزې شوي دي.
په ويانا کې د يهودانو د ټولنې مشر، اوسکار دويچ، وويل چې دغه وسلواله حمله په هغه کوڅه کې چيرته چې د ښار جامع کنيسه واقع ده، شوې ده، خو معلومه نه ده چې آيا د حمله کونکو هدف همدا کنيسه وه او که نه. دويچ پر ټويټر لیکلي دي چې کنيسه له دغو ډزو څخه د مخه تړل شوې وه.
د اتريش صدراعظم سیبستیان کورڅ ويلي دي: «موږ د هيواد په پلازمينه کې د يوې بدمرغې تروريستي حملې قرباني شوي يو کوم چې لا هم ادامه لري.»
د ويانا بريد د اروپايي هيوادونو د مشرانو له خوا غندل شوی دی. د فرانسې ولسمشر، امانوئل ماکرون، پر ټويټر باندې د اتریش له خلکو سره خپله غمشريکي ښودلې ده. هغه ليکلي: «د ويانا خلک نن شپه تر يو تروریستي بريد لاندې راغلي دي.»
د ربي شلومو هومفایستر په نوم يو عیني شاهد اسوشتید پریس خبري آژانس ته وويل چې لږ تر لږه يو کس يې وليد چې په هغو خلکو يې ډزې کولي. دی وايي چې برید د دوی د کور مخې ته شوی او پر خلکو د ډزو صحنی يې په خپلو سترګو ليدلې دي. هغه وايي: «بريد ګر د يو بار مخته په څوکيو باندې ناستو کسانو باندې چې شمیر به يې سلو ته رسیده ډزې پيل کړې.»
په رپوټ کې زياته شوې چې دغه بريد په اتريش کې د کرونا ويروس د مخنيوي په موخه د حکومت له خوا د وروستي اعلان شوي قرنطين له عملي کيدو يوازې څو ساعته مخکې شوی دی. دا وروستی ماښام وو چې رستورانټونه او بارونه په ویانا ښار کې خلاص ول.
آژانسونه/م.ک.ص./ب.ص.
زموږ له آرشیف څخه:
پر عبادتځایونو د خونړیو بریدونو پېښې
په ټوله نړۍ کې په تیرو څو کلونو کې پر یو شمیر عباتځایونو او مذهبي ځایونو بریدونه شوي دي. پر مسجدونو، کلیساوو او د یهودانو پر عبادتځایونو د ځینو خونړیو پيښو لنډ جزئیات د انځورونو په دې ګالرۍ کې لیدلی شئ.
انځور: Reuters/J. Silvaد کرایسټ چرچ په ښار کې پر مسجدونو یرغل
د نوي زیلنډ په کرایسټ چرچ ښار کې پر دوو مسجدونو د فیرونو په پېښه کې ۵۱ مسلمانان ووژل شول او تر۵۰ زیات ټپیان شول. بریدګر برینټن ټیرنټ، د ۲۰۱۹م کال د مارچ پر ۱۵مه نېټه په دغه ښار کې په النور مسجد کې د جمعې د لمانځه پر مهال پر عبادت کوونکو ډزې کړې وې. دغه خونړۍ پيښه هغه د فیسبوک پر ټولنیزه پاڼه په ژوندۍ بڼه خپروله. اوس د دغه برید ګر محاکمه جریان لري.
امریکا متحده ایالات: د یهودانو د «هنوکا» پر مذهبي مراسمو برید
له نیویارک څخه کابو د یوه ساعت په واټن کې د مونسې په سیمه کې ډیر شمیر ارتودوکس یهودان مېشت دي. د ۲۰۱۹م کال په دسمبر میاشت کې د یهودانو د یوه راهب په کور کې یو کس پنځه تنه په چړې ټپیان کړل. د نیویارک چارواکو د کرکې انګیزه لرونکی دغه برید سخت وغانده.
آلمان: د یهودانو پر عبادتځای حمله
د تیر میلادي کال په اکتوبر میاشت کې د آلمان د زاکسن انهالت ایالت په هاله ښار کې د یهودانو یوه عبادتځای ته یوه وسله وال بریدګر د ننوتو ناکامه هڅه وکړه. دا چې بریدګر ودانۍ ته په ورننوتلو ونه توانید دغه ځای ته څیرمه پرتې هدیره کې يې یوه ښځه په ډزو ووژله. دغه مهال په کنیسه کې د یهودانو د «یوم کيپور» په مذهبي مراسمو کې اتیا کسانو ګډون درلود.
افغانستان: په ننګرهار کې په یوه مسجد کې خونړی برید
د ۲۰۱۹م کال په اکتوبر میاشت کې د ننګرهار ولایت د هسکه مېنه ولسوالۍ په جودرې کې په یوه مسجد کې د جمعې د لمانځه پر مهال د چاودنې له کبله تر ۶۰ زیات کسان ووژل شول. د چاودنې پر مهال د مسجد دننه شا او خوا ۲۵۰ کسان ول. په پيښه کې په لسونو کسان ټپیان هم شول.
سریلانکا: په کلیساوو کې چاودنې
تیر میلادي کال په سریلانکا کې د عیسویانو د ایستر اختر پر مهال پر درو کلیساوو او درو هوټلونو باندې د سخت دریځه اسلامپالو له لوري د ځانمرګو بریدونو د لړۍ په ترڅ کې ۲۶۰ کسان ووژل شول. ځایي تندلارو په دوو کاتولیک او یوې پروتستنات کلیسا کې ځانمرګي بریدونه وکړل چې ډیر ماشومان پکې هم ووژل شول.
کالفورنیا: په کنیسه کې فیرونه
د سریلانکا تر بریدونو یوه اوونۍ وروسته د امریکا متحده ایالاتو په کالفورنیا ایالت کې د یهودانو پر یوه عبادتځای باندې د فیرونو په پایله کې یوه ښځه ووژل شوه. ۱۹ کلن سپین پوستی شکمن بریدګر ونیول شو.
تایلنډ: د بودایانو پر عبادتځای باندی حمله
د ۲۰۱۹م کال په جنورۍ میاشت کې د تایلنډ په سویلي ایالت نارتهیوات کې وسله وال بیلتون غوښتونکي د بودانو یوه عبادتځای ته ورننوتل او فیرونه یې وکړل. په رتناو پاپ، نومې عبادتځای کې په دغه پېښه کې دوه کسان ووژل شول.
په فلیپین کې پر کلیسا تر برید وروسته پر مسجد حمله
د فلیپین په سویل کې د ۲۰۱۹م کال د جنورۍ میاشتې پر ۳۰مه نېټه پر مسجد باندې په یوه برید کې دوه کسان ووژل شول. دغه برید د یوه لاسي بم په واسطه شوی وو. د جنورۍ پر ۲۷مه نېټه پر یوه کلیسا هم یو خونړی برید شوی وو. د دغه برید په ترڅ کې د کاتولیک مسیحانو یوه کلیسا په نخښه شوې وه. په دغه چاودنه کې ۲۳ تنه وژل شوي او سل نور ټپيان شوي ول.
د هند په پنجاب ایالت کې پر درمسال برید
د هند په شمال کې د سکانو پر یوه عبادتځای باندې د لاسي بمونو د برید په پایله کې درې کسان ووژل شول او په لسونو نور ټپیان شول. دغه پېښه د ۲۰۱۸م کال په نومبر میاشت کې د هند د پنجاب ایالت په یوه کلي کې رامنځ ته شوې وه. د حملې پر مهال په ګوردواره یا درمسال کې په سلونو عبادت کوونکو حضور درلود.
امریکا متحده ایالات، پېنسلوینیا
د ۲۰۱۸م کال په اکتوبر میاشت کې د امریکا متحده ایالاتو د پېنسلوینیا په پېتسبرګ، نومې ښار کې د یهوادنو پر یوه کنیسه باندې د برید په پایله کې ۱۱ کسان ووژل شول.
په پاکستان کې د احمدیانو پر عبادتځای برید
د ۲۰۱۸م کال په اګست میاشت کې د پاکستان د پنجاب ایالت فیصل آباد ښار ته څیرمه په یوه کلي کې خلکو د احمدیانو پر یوه عبادتځای هجوم وروړ او شپږ کسان یې ټپیان کړل. په پاکستان کې په متواتر ډول پر احمدي ټولنې بریدونه کیږي. د پاکستان پارلمان په ۱۹۷۴م کال کې احمدیان د غیرمسلمان اقلیت په توګه اعلان کړي وو.
د ۲۰۱۷م کال په اکتوبر میاشت کې په کابل کې د شیعه مسلمانانو په مسجد کې د یوه ځانمرګي برید په پایله کې ۳۹ کسان ووژل شول او تر ۴۱ زیات ټپیان شول. د بريد پړه داعش ترهګرې ډلې پر غاړه واخيستله.
