د اوکراین ولسمشر ولادیمیر زیلنسکي د امریکا متحده ایالاتو له ولسمشر جو بایډن سره د یکشنبې (د جون میاشتې ۲۵ نیټه) په ورځ په روسیې کې د واګنر ملیشه ډلې د ناکامه پاڅون په اړه تلیفوني خبرې کړي دي.

کيف: په روسيه کې ګډوډي زموږ په ګټه ده

د دواړو مشرانو ترمنځ دغه خبرې د روسیې د واګنر ډلې مشر یوګني پریګوژین، له ناکامه شورش او د اوکراین په سویل او ختیځ کې د خپلې اشغال شوې خاورې د بیرته نیولو له پاره د دغه هیواد د ځوابي بریدونو د پيلیدو په درشل کې صورت نیولی دی.

زمونږ له فیسبوک شبکې پاڼې سره یوځای شئ:

زمونږ له یوټيوب شبکې سره یوځای شئ:

زیلنسکي په خپل تویتر کې لیکلي دي چې د جګړې بهیر او هیواد ته یې د لیري واټن توغندیو د سپارل کیدو په هکله له خپل امریکایي سیال سره خبرې کړي دي: «مونږ په روسیه کې د دښمنیو بهیر او د هغه څه چې رامنځته کیږي، په هکله خبرې وکړې. نړۍ باید روسیه د نړیوال نظم تر ټینګښت پورې تر فشار لاندې ونیسي.»

زیلنسکي همدارنګه ویلي چې په دغه تلیفوني اړیکه کې یي له بایډن سره په راتلونکي میاشت کې په ویلنیوس کې د ناټو د راتلونکي غونډې په هکله خبرې کړې دي. «شپيګل انلاین» الماني رسنۍ لیکلي دي چې اوکراین هیله لري چې له ناټو سره د یوځای کیدو له پاره دغه هیواد ته بلنه ورکړل شي.

د اوکراین ولسمشر په خپل ویډیویې پیغام کې وویل چې په اوکراین کې د روسیې یرغلیز برید اوس پخپله روسیه کې هم د لا زیات زیان رامنځته کیدو سبب شوی دی. هغه وویل: «هر څومره چې د روسیې تیری ډیر اوږد شي، پخپله روسیه به همدومره ډیر زیان وويني.»

زیلنسکي د روسي اشغالګرو له خوا د زاپوریژیا اټومي بټۍ تاسیساتو ته د احتمالي زیان اړول کیدو په هکله خبرداری ورکړ. هغه وویل: «په نړۍ کې مونږ ټول باید د اټومي شعاو د هر ډول پيښو د مخنیوي په خاطر ډیر اغیزمن اقدامات وکړو».

«روسیې ته د واګنر د سرتیرو ننوتل»؛ په مسکو کې د ترهګرۍ ضد اقدامات

زیلنسکي زیاته کړه چې تر اوسه پورې د زاپوریژیا اټومي بټۍ ته د روسیې له خوا موجود ګواښونو ته په کافي اندازه د نړیوالو پام نه دی را اړول شوی. دغه اټومي بټۍ د ۲۰۲۲م کال د مارچ میاشتې راهیسې د روسي پوځ له خوا اشغال شوې ده.

د شپيګل اونیزې مجلې لیکلي دي، یو شمیر الماني سیاستوال ګمان کوي چې پوتین اوس د اوکراین پر وړاندې جګړه کې «لا زیات یرغلیز او لا زیات وحشیانه» عمل کوي.

آژانسونه: ش.ن/ ب.ص