د روغتیا نړېوال سازمان له نړېوالو مرستندویه بنسټونو غوښتي دي چې له پاکستانه راستانه شویوافغان کډوالوته د روغتیايي خدماتو رسولو له پاره شاوخوا لس میلیونه ډالرو ته اړتیا ده.

دغه سازمان پر خپله اکس پاڼه لیکلي: «په داسې حال کې چې په پام کې ده ۱،۳ میلیونه افغان کډوال له پاکستانه افغانستان ته ستانه شي، دا هيواد وار له مخه له لویو روغتیايي ستونزو سره له هغې ډلې د ناروغیو د خپریدو له ګواښ سره مخامخ دی.»

دغه نړېوال سازمان زیاته کړې چې شاوخوا ۷۰۰ زره راستانه شویو کډوالو له پاره د بنسټيزو روغتیایي خدمتونو چمتو کولو له پاره باید لس میلیونه ډالر مرسته وشي.

راستانه شوي کډوال د کومو ناروغیو له خطر سره مخ دي؟

په لنډمهاله پنډغالو کې ځای پر ځای شوي افغانان د ژوند د ناسمو شرایطو له امله د ژر خپریدونکو ناروغیو او سو تغذي په څېر ناروغیو له ګواښ سره مخامخ دي.

په لوړ عمر لرونکو کسانو او مېندوارو مېرمنو کې د بدني او رواني فشار یا سټریس ډېرېدو ویره هم شته.

د روغتیا نړېوال سازمان وايي، د ناکافي درملو له امله په راستانه شویو کډوالو کې د ویني په لوړ فشار او شکري یا ډیابت په څېر ناروغیو اخته کسان هم له سختو ستونزو سره مخامخوي.