«په اروپا کې جګړه؛ افغانستان او افغانان هېر شوي»
۱۴۰۲ فروردین ۲۵, جمعه
د اروپا پارلمان غړې ایرنسټ کارنیلیا ویلي دي چې، په اروپا کې د جګړې له پيل سره سم د افغانستان د خلکو دردونه او کړاوونه هیر شول. هغې د افغانستان د بشري وضعیت په اړه یوې غونډي ته وویل: «نړۍ د افغانستان ښځې او نجونې پرېښي دي.»
د افغانستان په تړاو دا غونډه د اروپا پارلمان رابللې وه. اغلې ارنسټ په دې اړه پر خپله ټویټر پاڼه لیکلي: «نړۍ باید د افغانستان خلک هیر نه کړي.»
د افغانستان بشري وضعیت او کډوالۍ په اړه د اروپا پارلمان د دې غونډي په اړه د اروپا پارلمان کیڼ اړخو په خپله ټویټرپاڼه لیکلي: «موږ باید واورو چې هلته څه پيښیږي، ترڅو موږ د خلکو په غوره ملاتړ وتوانیږو.»
هاخوا چین د افغان میرمنو پرضد د طالبان سختدریځۍ اندېښمن کړی. د چین رسمي خبري آژانس د رپوټ له مخې، د هغه هيواد د بهرنیو چارو وزیر کین ګانګ ویلي دي چې هېواد یې د ښځو په اړه د طالبانو سخت سیاست له امله اندېښمن دی.
کینګ د پنجشنبې په ورځ خبریالانو ته ویلي: «چین او نور ګاوڼدي هيوادونه د طالبانو د وروستیو سیاستونو، تدبیرونو او د افغان مېرمنو پر بنسټیزو حقونو د هغوی د اغیزو له امله اندېښمن دي.»
د اروپا پارلمان، چین او ځينو نورو هيوادونو اندېښنې په داسې مهال دي چې طالبانو تازه په ملګرو ملتونو کې د افغان ښځو پر کار بندیز لګولی دی.