د اروپايي اتحادیې د پناه غوښتنې آژانس د روان میلادي کال د جنوري میاشتې نه د سپتمبر میاشتې تر وروستۍ نیټې پوري په آلمان کې ۲۴ سلنه کم د پناه غوښتنې درخواستونه ثبت کړي دي. دغه شمیرې د «بیلډ ام زونتاګ» په نامه یوې آلمانۍ ورځپاڼې د اروپايي ټولنې د پناه غوښتنې د شمیرو پر اساس خپرې کړی دی.
د پناه غوښتنې د درخواستونو دغه شمیرې چې د محرمو یا پټو معلوماتو په توګه هم درجه بندي شوي دي، د اروپايي اتحادیې د کمیسیون په ۴۳۰ ګڼه راپور کې د روان کال د اکتوبر میاشتې پر ۳مه نیټه، په دریم ګړیو هیوادونو کې د کډوالۍ د وضعیت په هکله خپرې شوي دي.
د دغه رپوټ په حواله، په آلمان کې کابو هر دریم د پناه غوښتنې (۳۰ سلنه) درخواست د سوریايي وګړي دی. د افغانستان د اتباعو د پناه غوښتنې د درخواستونو کچه بیا ۱۵ سلنه او د ترکیې بیا ۱۳ سلنه ښوول شوې ده.
هغه ایټالوۍ چې د افغان او پاکستاني مهاجرو پر پښو ملهم ږدي
This browser does not support the video element.
آلمان د اروپايي ټولنې د نورو هیوادونو په پرتله د ۱۷۰ زره او ۹۶ د پناه غوښتنې د درخواستونو په ترلاسه کولو سره، په دې ټولنه کې تر نورو هیوادونو مخکښ دی. تر دې وروسته هسپانیا کې ۱۲۲ زره او ۹۶ د پناه غوښتنې درخواستونه، ایټالیا کې ۱۱۷ زره ۴۲ او فرانسه کې بیا ۱۱۵ زره او ۶۵۲ د پناه غوښتنې درخواستونه ثبت شوي دي. په دې ډله کې تر ټولو کم د پناه غوښتنې درخواستونه په هنګري کې ۲۱، سلواکیا کې ۱۲۱ او لتوانیا کې ۲۸۴ دغه راز درخواستونه ثبت شوي دي.
د «بیلډ ام زونتاګ» په نامه د یادې آلمانۍ ورځپاڼې په حواله، د اروپايي ټولنې کمیسیون همدا راز په خپل محرمانه رپوټ کې له لبنان څخه د اروپا په لوري د مهاجرت د یوې بلې احتمالي څپې په هکله هم خبرداری ورکړی دی. په دغه رپوټ کې په اروپا کې د کډوالۍ د وضعیت په هکله راغلي: «په لبنان کې د ګڼ شمیر (شاوخوا یو نیم میلیون) سوریايي کډوالو د شتون او په دغه هیواد کې د بشري وضعیت د خرابیدو په دلیل له دغه هیواد څخه د تښتیدونکو کسانو شمیر لا پسې لوړ شي.»
د جرمني څخه د مهاجرو د اخراج مقررات څه ډول دي؟
د جرمني داخله وزیر د ۱۶ ایالتونو د کورنیو چارو د وزیرانو سره تریوه ویدیو کنفرانس وروسته اعلان وکړ، چي د جنورۍ له اولي څخه به د پناه غوښتني قضیو ته په کتو سره د اخراجیدو په هکله تصمیم نیول کیږي. نور جزيات دلته ولولئ:
انځور: picture-alliance/W. Rothermelد جرمني داخله وزارت وايي، چي د سوریایانو د اخراج د منع کیدو لایحه به تمدید نسي. داخله وزير هورست زېهوفر په دې تړاو مخکي هم څرګندونې کړي وې. خو منتقدین دا د پناه غوښتونکو څخه د ساتني بین المللي حقوقو خلاف بولي. د ویچه ویله دلته د دغي مسألې حقوقي اړخونو ته یوه کتنه کړې ده: هغه مقرره چي د ۲۰۱۲ م کال راهیسي په منظم ډول سره تمدیدیږي، په پام کي لري، چي سوریایان خپل هیواد ته د اخراج څخه وساتي.
په سوريه کي د امنيت نشته والی
په سوریه کي اوس هم جنګ دوام لري. دا په دې معنی ده، چي حتی رد سوي پناه غوښتونکي هم، د مجرمینو په شمول په جرمني کي پاته سي. منتقدین وايي، چي په سوریه کي هیڅ ډول امنیتي شرایط وجود نلري. خو داخله وزیر، هورست زیهوفر د ۱۶ ایالتونو د کورنیو چارو د وزیرانو سره تر یوه ویدیو کنفرانس وروسته اعلان وکړ، چي د جنورۍ میاشتي د اولي څخه به د پناه غوښتني قضیو ته په کتو سره د اخراجیدو په هکله تصمیم نیول کیږي.
ولي د اخراجیدو ممانعت لغؤ سو؟
په جرمني کي د هغو پناه غوښتونکي، چي رد سوي، او یا یې جرمونه کړي وي، (دولدونګ) یا د پاته کیدلو مؤقتي ویزه ورکول کیږي. خو ددغو کسانو پرضد همیشه د ښی اړخو افراطیانو لخوا اعتراضونه کیږي او تر ټولو دمخه د مسلمانانو پر ضد. د ۲۰۱۱ م کال راهیسي د سوریې جنګ، چي تر ۳۸۷ زره اضافه انسانان پکښي ووژل او په ملیونو کسان د وطن پریښولو ته مجبوره سول، ددې سبب سو، چي شکمن کسان هم په جرمني کي پاته سي.
د جرمني په داخله وزارت کي د ساختماني او هیواد ساتني چارو معین، هانس ګیورګ انګلکه پرون جمعه خبریالانو ته وویل:«هغه کسان چي جرمونه کوي او یا تروریسټي اهداف مخته وړي، زموږ دولت او خلګو ته تاوان رسوي او باید د جرمني څخه اخراج سي.» خو د زیهوفر د اظهاراتو پراساس د تقریبأ ۷۷۰ زرو سوریایانو څخه چي په دې وروستیو وختونو کي جرمني ته راغلي دي، فقط تقریبأ ۹۰ کسانو ته یې د خطرناکو کسانو په سترګه کتل کیږي.
د اخراج څخه انتظارات محدود دي
د کرونا دویروس په سبب د سفر پر محدودیتونو سربیره، سوریې ته په نورو دلایلو هم اخراج ممکن ندی: د نیدرساکسن ایالت داخله وزیر، بوریس پستوریس په دې باب وویل،«په سوریه کي هیڅ داسي مؤسسه وجود نلري، چي موږ د هغه سره ډیپلوماتیک روابط ولرو.»په دې دلیل هغه او سوسیال دموکراټ حزب یې سوریې ته د نه اخراج د قاعدې لغؤ کیدل رد او کوښښ یې وکړ، چي هغه د ۶ نورو میاشتو دپاره تمدید کړي.
د یوه رپوټ پراساس آلمان په ۲۰۱۹ م کال کي۲۲۰۰۰ تنه اخراج کړي دي. البانیا، نایجریا، ګرجستان، روسیه او صربستان د هغو هیوادو د جملې څخه وه، چي په همدغه کال کي یې هر یوه ته زر زر تنه اخراج سول. په همدغه وخت کي تقریبأ ۹۳۰ افغانان او ۸۶۰ عراقیان هم اخراج سوي دي. د رپوټ پر بنأ په ۲۰۱۹ م کال کي د اخراجیدو تقریبأ ۴۰ فیصده موارده د اروپا د اتحادیې نورو هیوادو لکه فرانسې او ایټالیا ته تر سره سوي دي.
هغه کسان نباید د جرمني څخه اخراج سي، چي په خپلو هیوادونو کي یې د جنګونو، تعقیب او یا ازار په دلیل ژوند ته خطر موجود وي. په دغه صورت کي د هغوی اخراج د اروپا د بشر د حقوقو د کنوانسیون څخه سرغړونه ده. دغه کنوانسیون د هغوکسانو اخراجیدل هم منع کوي، چي په خپلو هیوادونو کي د شکنجې سره مخامخ کیدلای سي.
