آلمان د خبري آژانس د خبر له مخي په روان عيسوي کال کي و آلمان ته د غير اصولي راتګونو شمېر په ښکاره توګه زيات سوی دی. د آلمان په دوسلدورف کي چاپېدونکي ورځپاڼي «راينيشه پوست» د چارواکو په حواله راپور ورکړی دی چي فدرالي پوليسو د کال له پېل څخه بيا د سپتمبر تر ۲۸ نېټي پوري د غير اصولي داخلېدنې ۵۶۸۰۰ موارد ثبت کړي دي.
دوو مرستندویه آلماني کښتیو سلګونه مهاجر له ډوبیدو ژغورلي دي
د راپور له مخي په دې توګه په ياده پديده کي د مخکیني کال په پرتله د ۶۰ فيصدو اضافه سوې ده. د آلمان فدرالي پوليسو چي د سرحد ساتنې وظيفه هم په غاړه لري، تېر عيسوي کال يې د سپتامبر تر ۳۰ نېټي پوري ۳۵۰۰۰ داسي موارد ثبت کړي ول. د کرونا پاندمي له پېل مخکي په ۲۰۱۹ بشپړ کال کي ۴۰۶۰۰ کسانو آلمان ته بېله اجازې او اړينو اسنادو د داخلېدو هڅه کړې وه.
يادي ورځپاڼي د پوليسو د يوه ویاند له قوله ليکلي دي چي تر ټولو زياتې د بې اجازې داخلېدنې د چيک جمهوريت سره پر پوله ثبت سوي دي. ياد وياند ويلي چي د روان ۲۰۲۲ کال په لومړيو ۹ مياشتو کي پر ياده پوله ۱۱۸۲۷ د انسانانو غيراصولي ننوتنې رامنځته سوي دي. د دغه چارواکي په وينا «يوازي د اګست او سپتامبر په مياشتو کي تر ۶۵۰۰ څخه زيات» موارد ثبت سوي دي.
د پوليسو وياند و ورځپاڼي ته ويلی دي چې د ۲۰۲۱ کال په آخره کي له بېلاروس څخه د مهاجرت د فشار د کمېدو راهيسي په لومړي ځل بيا آلماني چارواکو د اپريل مياشتي راهيسي په مياشت کي په زرونو د انسانانو غيراصولي داخلېدنو موارد ثبت کړي دي.
آ./ا.ا./ا.خ.ح.
د جرمني څخه د مهاجرو د اخراج مقررات څه ډول دي؟
د جرمني داخله وزیر د ۱۶ ایالتونو د کورنیو چارو د وزیرانو سره تریوه ویدیو کنفرانس وروسته اعلان وکړ، چي د جنورۍ له اولي څخه به د پناه غوښتني قضیو ته په کتو سره د اخراجیدو په هکله تصمیم نیول کیږي. نور جزيات دلته ولولئ:
انځور: picture-alliance/W. Rothermelد جرمني داخله وزارت وايي، چي د سوریایانو د اخراج د منع کیدو لایحه به تمدید نسي. داخله وزير هورست زېهوفر په دې تړاو مخکي هم څرګندونې کړي وې. خو منتقدین دا د پناه غوښتونکو څخه د ساتني بین المللي حقوقو خلاف بولي. د ویچه ویله دلته د دغي مسألې حقوقي اړخونو ته یوه کتنه کړې ده: هغه مقرره چي د ۲۰۱۲ م کال راهیسي په منظم ډول سره تمدیدیږي، په پام کي لري، چي سوریایان خپل هیواد ته د اخراج څخه وساتي.
په سوريه کي د امنيت نشته والی
په سوریه کي اوس هم جنګ دوام لري. دا په دې معنی ده، چي حتی رد سوي پناه غوښتونکي هم، د مجرمینو په شمول په جرمني کي پاته سي. منتقدین وايي، چي په سوریه کي هیڅ ډول امنیتي شرایط وجود نلري. خو داخله وزیر، هورست زیهوفر د ۱۶ ایالتونو د کورنیو چارو د وزیرانو سره تر یوه ویدیو کنفرانس وروسته اعلان وکړ، چي د جنورۍ میاشتي د اولي څخه به د پناه غوښتني قضیو ته په کتو سره د اخراجیدو په هکله تصمیم نیول کیږي.
ولي د اخراجیدو ممانعت لغؤ سو؟
په جرمني کي د هغو پناه غوښتونکي، چي رد سوي، او یا یې جرمونه کړي وي، (دولدونګ) یا د پاته کیدلو مؤقتي ویزه ورکول کیږي. خو ددغو کسانو پرضد همیشه د ښی اړخو افراطیانو لخوا اعتراضونه کیږي او تر ټولو دمخه د مسلمانانو پر ضد. د ۲۰۱۱ م کال راهیسي د سوریې جنګ، چي تر ۳۸۷ زره اضافه انسانان پکښي ووژل او په ملیونو کسان د وطن پریښولو ته مجبوره سول، ددې سبب سو، چي شکمن کسان هم په جرمني کي پاته سي.
د جرمني په داخله وزارت کي د ساختماني او هیواد ساتني چارو معین، هانس ګیورګ انګلکه پرون جمعه خبریالانو ته وویل:«هغه کسان چي جرمونه کوي او یا تروریسټي اهداف مخته وړي، زموږ دولت او خلګو ته تاوان رسوي او باید د جرمني څخه اخراج سي.» خو د زیهوفر د اظهاراتو پراساس د تقریبأ ۷۷۰ زرو سوریایانو څخه چي په دې وروستیو وختونو کي جرمني ته راغلي دي، فقط تقریبأ ۹۰ کسانو ته یې د خطرناکو کسانو په سترګه کتل کیږي.
د اخراج څخه انتظارات محدود دي
د کرونا دویروس په سبب د سفر پر محدودیتونو سربیره، سوریې ته په نورو دلایلو هم اخراج ممکن ندی: د نیدرساکسن ایالت داخله وزیر، بوریس پستوریس په دې باب وویل،«په سوریه کي هیڅ داسي مؤسسه وجود نلري، چي موږ د هغه سره ډیپلوماتیک روابط ولرو.»په دې دلیل هغه او سوسیال دموکراټ حزب یې سوریې ته د نه اخراج د قاعدې لغؤ کیدل رد او کوښښ یې وکړ، چي هغه د ۶ نورو میاشتو دپاره تمدید کړي.
د یوه رپوټ پراساس آلمان په ۲۰۱۹ م کال کي۲۲۰۰۰ تنه اخراج کړي دي. البانیا، نایجریا، ګرجستان، روسیه او صربستان د هغو هیوادو د جملې څخه وه، چي په همدغه کال کي یې هر یوه ته زر زر تنه اخراج سول. په همدغه وخت کي تقریبأ ۹۳۰ افغانان او ۸۶۰ عراقیان هم اخراج سوي دي. د رپوټ پر بنأ په ۲۰۱۹ م کال کي د اخراجیدو تقریبأ ۴۰ فیصده موارده د اروپا د اتحادیې نورو هیوادو لکه فرانسې او ایټالیا ته تر سره سوي دي.
هغه کسان نباید د جرمني څخه اخراج سي، چي په خپلو هیوادونو کي یې د جنګونو، تعقیب او یا ازار په دلیل ژوند ته خطر موجود وي. په دغه صورت کي د هغوی اخراج د اروپا د بشر د حقوقو د کنوانسیون څخه سرغړونه ده. دغه کنوانسیون د هغوکسانو اخراجیدل هم منع کوي، چي په خپلو هیوادونو کي د شکنجې سره مخامخ کیدلای سي.
