Korrespondenti i radios për ARD-në në Stamboll, Steffen Wurzel, i cili punon pranë Südwestrundfunk dhe producenti i studios së ARD-së në Stamboll, Mehmet Uksul, morën Çmimin Gazetaresk të Parlamentit të Komisionit Evropian në kategorinë e radios. Së bashku, ata u nderuan për reportazhin e Wurzelit "Refugjatë, trafikantë dhe gardhe". Në këtë reportazh gazetari 31-vjeçar përshkruan, se si sillet dhe i trajton BE-ja refugjatët në kufijtë e saj, sidomos në kufirin greko-turk. Vitin e kaluar përmes këtij kufiri ka pasur kryesisht refugjatë nga Afrika e Veriut që janë përpjekur për të hyrë nga Turqia në BE.

Në kufirin grek kontrollon në emër të BE-së Agjencia për Mbrojtjen e kufirit Frontex. Steffen Wurzel ka intervistuar si rojet e kufirit dhe refugjatët dhe pasqyron mjaft bukur fatet, ndjenjat dhe ngjarjet në kufirin e jashtëm të BE-së. Juria evropiane e përbërë nga gazetarë dhe deputetë e quajti këtë reportazh "një pjesë të shkëlqyer të punës gazetareske." Autori ka gjetur disa partnerë shumë interesantë për intervistat dhe me përshkrimet e tij ka krijuar një atmosferë pothuajse kinematografike.

Çmimin Evropian për Gazetari u shpërnda këtë vit për herë të katërt dhe shoqërohet me 5.000 €. Parlamenti Evropian vlerëson me të gazetarë që trajtojnë çështje madhore evropiane apo që me punën e tyre ndihmojnë për të përmirësuar të kuptuarit e Evropës në tërësi.

Steffen Wurzel u lind në 1979 në Rastatt. Që gjatë shërbimit civil dhe kohës së studimeve për histori, ai ka punuar si prezantues dhe gazetar për emisionin DASDING, vala e të rinjve në Südwestrundfunk. Pas stazhit të tij në SWR (2006-2008) ai ka punuar si redaktor lajmesh, autor dhe moderator. Që nga maji 2010, Steffen Wurzel raporton për radio ARD si korrespondent i SWR nga Stambolli dhe Athina.

Mehmet Uksul ka lindur në Frankfurt dhe punon për shumë vite si producent për ARD në Stamboll. Ai hulumton shumë nga temat e studios së ARD dhe mbështet korrespondentët që shkojnë atje.43-vjeçari punon si gazetar, përkthen libra dhe punon edhe për gazetat turke.

Autor: dpa/dw; P. Pani

Redaktoi: Mimoza Kelmendi