Vendimi që ka ndarë amerikanët dhe nuk zë vend vetëm në emisionet e njohura televizive në SHBA, por edhe tek vizitorët në meshën e së dielës në kishën St. Augustine, kisha më e madhe e komunitetit afro-amerikan në Uashington. "Një burrë i bardhë ka vrarë një afro-amerikan; është shumë thjesht që nga kjo ngjarje të kalosh tek racizmi. Por duhet të jemi të kujdesshëm dhe të mësojmë prej kësaj", i thotë i riu Raymon Umunna Deutsche Welle-s. Të tjerët nuk argumentojnë me kaq maturi. Një vizitore që nuk do të t'i përmendet emri shan gjykatësit e njëanshëm.

Ndërkohë që interneti është i mbushur me fyerje për të liruarin George Zimmerman dhe gjykatën. "Ai duhet varur", shkruan dikush. Ndërsa një tjetër poston në internet shënimin "se nuk ka barazi para ligjit". Shitësi i gazetave në kioskën përballë kishës psherëtin. E gjitha është "një ngjarje e trishtueshme" në fund të fundit, Trayvon Martin ishte i paarmatosur. Për shitësin e kioskës nuk bëhet thjesht fjalë për racizëm, por për një çështje statusi. Zimmerman është djali i një gjykatësi. "Ata bëjnë ç'të duan" dorëzohet ai dhe kthen kurrizin.

Vendimi për lirimin e George Zimmerman-it, i cili në vetëmbrojtje vrau një të ri afro-amerikan 17 vjeçar, Trayvon Martin në një qytet në Florida, nuk ka kaluar pa lënë gjurmë edhe tek famulltari. Gjatë meshës ai përmend raste të panumërta të diskriminimit të drejtpërdrejtë e përjashtimit, por në fund i drejton kërkesën komunitetit të tij të ecë përpara duke dhënë shembullin e mirë.

Përgjegjësi e politikës

Michael Werz, nga "Qendra për Progresin Amerikan" në Uashington thekson përgjegjësinë e politikës. Ligji ekzistues në Florida "Mbroje truallin tënd" lejon në rast të një kërcënimi serioz përdorimin e armës, edhe po qe se ekziston mundësia e daljes prej një situate të tillë rreziku. Eksperti i thotë Deutsche Welle-s se kjo zonë gri e ligjit është terreni më i mirë për njerëz si George Zimmerman, që e shohin veten si "policë privatë". Ata bëjnë roje të armatosur në lagjen e tyre, "duke u përpjekur të përjashtojnë nga këto lagje njerëzit, për të cilët ata mendojnë se nuk e kanë vendin aty."

Obama kërkon ashpërsimin e ligjit të armëve

Presidenti amerikan Barack Obama u bëri thirrje amerikanëve të respektojnë vendimin. "Po qe se unë do të kisha një djalë, atëherë ai do t'i ngjante Trayvon-it", u përpoq ai të ngushëllonte familjen e viktimës. Obama e përdori rastin e Zimmermanit për iniciativën e tij të ashpërsimit të ligjit të armëve në SHBA. Ndërsa aktivisti për të drejtat e njeriut, Jesse Jackson kërkoi ruajtjen e qetësisë. Megjithatë ai përmendi se në jurinë e gjykatës nuk kishte asnjë pjesëtar nga komuniteti me ngjyrë. Prindërit e të riut të vrarë kishin akuzuar më parë gjykatën, se nuk kishte hetuar të gjitha rrethanat, vetëm për faktin se djali i tyre ishte afro-amerikan. Michael Werz ka mirëkuptim për akuzat e prindërve: "Ekziston një lidhje mes prejardhjes etnike, ngjyrës së lëkurës dhe diskriminimit social, që i çon njerëzit shpesh në një situatë të tillë, që bën që policia e gjykatat t'i vendosë ata në pozicionin e humbësit."

Diskriminim sistematik?

Eksziston vërtet në Amerikë, 50 vjet pas fjalimit të famshëm të Marthin Luther King, "I have a dream" diskriminimi sistematik i minoritetit me ngjyrë? Duket se ekziston një përshtypje e shumëpërhapur në jetën e përditshme se ngjyra e lëkurës ende luan rol në Amerikë, edhe pse nuk duhej të ishte kështu, sipas mendimit të shumicës. Kjo vlen edhe për komunitetet e huaja mes njëri-tjetrit. Zimmerman si "një hispanik i bardhë" ka origjinë amerikanolatine.

Çështja e racizmit shkakton konfrontime të mëdha emocionale si tek mediat amerikane ashtu edhe në internet. Eksperti Michael Werz shprehet se "paragjykimet luajnë rol "se ende ka racizëm në jetën e përditshme amerikane". "Por çështja kryesore, dhe ky qe edhe suksesi i madh i lëvizjes për të drejtat e njeriut ishte që ajo ia doli të sanksiononte kaq fort në ligj kërkesat e individit për trajtim të barabartë - në praktikën e transportit publik, universiteteve, institucioneve të qeverisë - saqë një diskriminim sistematik është shumë i vështirë, për të mos thënë i pamundur."