Saimir Rushiti prej dy viteve ka nisur të mësojë të luajë në klarinetë. E ka marrë me shumë pasion dhe dëshiron që të bëhet një instrumentist i mirë. Ai është njëri prej nxënësve të Shkollës Amaro Tan, një institucion edukues për fëmijët në nevojë i ngritur nga Fondacioni NEHEMIA në qytetin e Pogradecit. “Në këtë shkollë kam qënë që nga klasa e parë dhe aty përfundova 9 vjeçaren. Tani Fondacioni po më ndihmon që të vazhdoj dhe shkollën e mesme për muzikë në qytetin e Korçës”.

Saimiri është njëri prej 110 fëmijëve që ndjekin ose e kanë përfunduar shkollën Amaro Tan të NEHEMIA-s. Ky nuk është institucioni i vetëm arsimor i Fondacionit që njihet nga Ministria e Arsimit. Ka dhe një rrjet shkollash e kopshtesh, si dhe Universitetin NEHEMIA. Fondacioni ka dy dekada që zhvillon aktivitet në Shqipëri. Fillimisht duke mbështetur në ndihma humanitare dhe tashmë me projekte zhvilluese në fushën e arsimit, punën sociale dhe zhvillimin e komunitetit.

Nga dhënia e guximit tek vizioni për të ardhmen

Drejtori i Përgjithshëm i Fondacionit, Arnold Geiger e thotë me krenari se historia 20 vjeçare e NEHEMIA-s në Shqipëri, është historia e jetës së tij. Ai ishte vetë në vitin 1991 kur mbëriti në vendin që sapo ndahej nga diktatura gati gjysëm shekullore, për të nisur proceset demokratike dhe integrimin europian. Duke e ndarë në disa etapa kontributin e NEHEMIA-s në Shqipëri ai thotë se në fillim të viteve '90 u ofrua guximi dhe bujaria; në vitin e trazuar 1997 u dha shpresë dhe besim; në krizën e Kosovës dha përkrahje dhe zemërgjerësi; ndërkohë që aktualisht shfaq qëndrueshmëri dhe vizion për më tej. “Ka një rritje në Shqipëri. Kjo është vërtet shumë e dukshme. Unë udhëtoj kudo dhe kam parë se njerezit kanë angazhim dhe objektiva”, thotë Geiger për DW, duke veçuar bashkëpunimin e ngushtë me pushtetin lokal në Pogradec gjatë dy dekadave të fundit.

Pse e duan maturantët NEHEMIA-n

Ymer Duka, është bashkëpunëtor i Fondacionit NEHEMIA për rrethin e Durrësit. Ai është afruar me këtë organizatë që në vitin 1995. Ai kujton angazhimin e jashtëzakonshëm në kohën e krizës së Kosovës në vitin 1999, kur bashkë me miq të tij në Fondacion morën nën kujdes rreth 120 vetë, për t'i trajtuar ata me ngrënie, fjetje, ndihmë psikologjike, zhvillimin e aktviteteve argëtuese etj - thotë Ymer Duka për DW. “Kemi patur një qëndër pritjeje në Shijak. Ishte një magazinë e vjetër buke dhe aty kemi ngritur mencën dhe ambientet ndihmëse për ata që u sistemuan aty, në mënyrë që ata të ndihen mirë”.

Kurse Greta Muço është maturante në shkollën e mesme NEHEMIA dhe shpreh dëshirën që të vazhdojë ashtu si e motra Universitetin që është po strukturë e Fondacionit. “Më pëlqen se është në degën ekonomike, se është dual, d.m.th. edhe teorik edhe praktik, dhe se leksionet e seminaret bëhen në gjuhën angleze dhe me profesorë të huaj”, thotë Greta për DW-në.

Për zëvendësambasadorin e Republikës Federale të Gjermanisë në Shqipëri, Jurij Aston, ajo që ka ndodhur me NEHEMIA-n në Pogradec është një tregues se projektet e mëdha mund të bëhen edhe jashtë kryeqytetit. “E them me bindje se ky Fondacion është pjesë e historisë së këtij qyteti, një qytet që ka marrë dhe mjaft mbështetje me projekte konkrete nga Gjermania, si për sistemin e ujësjellës kanalizimeve, apo për mbrojten ekologjike të Liqenit” - shprehet Aston.

Autor: Arben Muka

Redaktoi: Lindita Arapi