Agjencitë e klasifikimit: Franca jo në listën e vendeve me kreditim të rrezikuar
11 Gusht 2011![Banka franceze Societe Generale](https://static.dw.com/image/3086975_800.webp)
Problemet e Greqisë, Portugalisë dhe Irlandës njihen prej kohësh, por edhe në Spanjë dhe Itali situata është ndërkohë kritike. E që prej disa ditësh, temë qendrore e bisedimeve është edhe Franca, ku problemi i borxheve mund të dalë jashtë kontrollit. Këto janë të paktën fjalët që u dëgjuan në bursa të mërkurën (10.08). Eksperti për tregun evropian i agjencisë së klasifikimit të riskut "Standard&Poors", Moritz Krämer u shpreh në studion e ARD-së për bursat:
"Edhe në zonën e Euros ne kemi një sërë kandidatësh me peshë, për të cilët kemi përshtypjen që rreziqet i çojnë me tepër për poshtë se sa sipër, këtu bën pjesë për shembull Italia, Spanja - Franca jo."
Pra aktualisht jo. Edhe shefi i Bankës së Madhe franceze, Societe Generale, Frederik Oudea i konsideron të shpikura këto spekullime:
Deri në një vendim tjetër vlerësimi për Francën mbetet te A-ja treshe
"Unë jam i habitur për këto spekullime. Kjo në një kohë kur agjencitë e mëdha e lanë vetëm pak kohë më parë te A-ja treshe klasifikimin e Francës dhe na konfirmuan notën më të mirë. Këto thashetheme janë të çuditshme."
Edhe Franca ndodhet e zhytur në borxhe, kuota e borxheve është mbi pesë përqind. Por me sa duket agjencitë e mëdha të klasifikimit për momentin nuk kanë ndërmend ta deklasifikojnë Francën. Fitch dhe Moodys konfirmuan gjithashtu se deri në një vendim tjetër duan ta lënë te A-ja treshe vlerësimin për Francën dhe ta ruajnë perspektivën siç është tani.
Në lidhje me thashethemen e dytë, se banka e tij, pra francezja Societe Generale ndodhet në vështirsësi financiare, Oudea gjeti fjalë edhe më të qarta: ato fjalë, sipas tij janë absolutisht plehëra. Aksioneve të bankës dhe bursave në botë këto përgënjeshtrime megjithatë nuk u sollën gjë: vlerat bankare ranë në një shumë dyshifrore dhe bënë që bursat në të gjithë botën të marrin tatëpjetën.
Autor: Mischa Erhrad / Auron Dodi
Redaktoi: Esat Ahmeti