Apeli i fundit për shërbimin e detyruar ushtarak në Gjermani
3 Janar 2011Për herë të fundit Bundesveri merr në uniformë ditën e hënë rekrutë për shërbimin e detyruar ushtarak edhe kundër dëshirës së tyre. Por ndërkohë qeveria gjermane ka bërë të ditur se në afatin e dytë, më 1 mars, nuk do të thirren më ushtarë pa dëshirën e tyre. Nga 1 korriku shërbimi i detyruar ushtarak do të zëvendësohet nga një shërbim vullnetar. Kjo vlen edhe për shërbimin civil. Bundesveri zvogëlon pas kësaj reforme numrin e ushtarëve profesionistë dhe rekrutë në 170.000 vetë.
Jo të gjithë të rinjtë e prisnin me gëzim rekrutimin
I ngarkuari i Bundestagut për Bundesverin, Hellmut Kënigshaus, është shprehur se ai e kupton që një pjesë e të rinjve, që thirren të hënën ushtarë, këtë e ndjejnë si padrejtësi, pasi shërbimi i detyruar këtë herë prek vetëm një pjesë të vogël të tyre. Ata, që nuk do të thirren më për shërbimin e detyruar ushtarak, e presin si lajm të mirë një gjë të tillë. Për një pjesë, të cilët e kanë planifikuar këtë shërbim në biografinë e tyre, tanimë do të duhet të gjejnë një angazhim të ri. "Mund ta kuptoj që ata që nuk do të thirren për një shërbim ushtarak, të cilin ata as nuk e dëshironin, sigurisht që gëzohen. Por nga ana tjetër ka edhe të rinj, që e kanë planifikuar një kohë të caktuar për këtë shërbim. Për ata tani është e vështirë, sepse nuk e dinë njëherë se çfarë do të bëjnë."
Por si është atmosfera në Bundesverin gjerman tanimë, kur po hiqet shërbimi i detyruar? Kënigshaus për këtë thotë: "Ka opinone të ndryshme. Njëra palë thotë që veçanërisht pas shkurtimit të shërbimit ushtarak, heqja e plotë e tij nuk i sjell ndonjë gjë ushtrisë. Pala tjetër bën një llogari të ftohtë që kompetencat specifike, që përfitoheshin nga rekrutët, mbikompensoheshin nga puna, që investohej për trajnimin e rekrutëve. Pra ka mendime ngë më të ndryshmet."
Bundesveri duhet të gjejë rolin e tij të ri
Që nga viti 1957 miliona të rinj gjermanë kanë shërbyer në ushtrinë gjermane, fillimisht për 12 muaj, pas rrëzimit të Murit të Berlinit për 18 muaj, pastaj kjo shifër u ul në 15 muaj, 12 muaj, 9 dhe së fundi në 6 muaj. Rekruti bazuar në traditën prusiane konsiderohej si një nyjë lidhëse mes ushtrisë dhe shoqërisë gjermane. Pas rrëzimit të perdes së hekurt, bundesveri u zvogëlua, pasi fqinjë kundrejt të cilëve duhej të mbrohej Gjermania nuk kishte më.
Kështu pak para vendimit për heqjen e shërbimit të detyruar ushtarak ishin vetëm 12% e gjeneratës së një viti, që vishnin uniformën. Ministri i Mbrojtjes, Karl Theodor zu Guttenberg, qe i pari që e preku një temë të nxehtë të Bundesverit dhe nisi reformën rrënjësore. Por ende Bundesveri duhet të gjejë rolin dhe detyrat e reja pas heqjes së shërbimit të detyruar ushtarak.
Autor: dpa/Lindita Arapi
Redaktoi: Angjelina Verbica