Ministrat e Brendshëm dhe ata të Drejtësisë të shteteve të Ballkanit Përendimor diskutojnë të Hënën dhe të Martën në Tiranë mbi problematikën e zbatimit të së drejtës së qarkullimit të shtetasve të tyre pa viza në zonën Schengen të BE-së. Në Ministerialin e Tiranës, veç ministrave të Brendshëm dhe të Brejtësisë nga Shqipëria, Maqedonia, Serbia, Bosnja dhe nga Mali i Zi, merr pjesë edhe Komisionerja e BE-së për Drejtësinë dhe Punët e Brendshme, Cecilia Malmström.

Shqetësimet e BE-së diskutohen në Tiranë

Në fund të muajit Tetor në takimin e Këshillit të ministrave të Brendshëm të BE-së në Luksenburg u ngritën një sërë shqetësimesh mbi abuzimin me procesin e liberalizimit të vizave për vendet e Ballkanit Perëndimor.

Kohët e fundit nga shtete anëtare të BE-së si Gjermania, Belgjika, Franca, Luksenburgu, Vendet e Ulta dhe Suedia janë shprehur ankesa në drejtim të Komisionit Europian mbi rritjen e numrit të azilkërkuesve nga rajoni, duke hedhur idenë edhe të një pezullimi të përkohshëm të së drejtës për lëvizjen pa viza për vendet problematike.

Pikërisht për të vlerësuar më mirë situatën dhe masat që duhet të merren nga autoritetet e vendeve të Ballkanit Përendimor për të frenuar fluksin e azilkërkuesve do të jenë në qendër të takimit të Tiranës që u hap të hënën pasdite. Çështje të tjera që janë paralajmëruar në axhendë lidhen dhe me procesin e Stabilizim -Asociimit për arritjet në sistemin e drejtësisë dhe të punëve të brendshme, luftën kundër trafikut të armëve, qënieve njerëzore, integrimit të romëve dhe të drejtave të tyre, transparencën si mjet në luftën kundër korrupsionit në sistemin e drejtësisë etj.