Mazedonien Unabhängigkeit
8 Shtator 2011![Pamje ilustruese](https://static.dw.com/image/15132375_800.webp)
Maqedonia vendosi për pavarësinë më 8. Shtator 1991, por njohja e shtetit të ri nga shtetet perëndimore zgjati me vite. Një komision i ngritur nga Bashkimi Evropian arriti në fillim të vitit 1992 në konkluzionin se nga republikat e ish-Jugosllavisë, vetëm Sllovenia dhe Maqedonia përmbushnin të gjitha kushtet për t'u njohur në shkallë ndërkombëtare. Gjermania e njohu shumë shpejt Kroacinë dhe Slloveninë me një vendim të sajin, pa pritur BE-në, por Maqedoninë e njohu në vitin 1996. Vetëm në vitin 1993, Maqedonia u bë anëtare me të drejta të plota në Kombet e Bashkuara. Por ky anëtarësim u bë vetëm nën emrin FYROM (Former Yugoslav Republic of Macedonia) për shkak të pretendimit të Greqisë ndaj emrit zyrtar të Republikës së Maqedonisë.
Rruga e vështirë pas pavarësisë
Maqedonia vuajti pasojat ekonomike të luftës në pjesë të tëra të ish-Jugosllavisë, embargon kundër Serbisë, por edhe atë që vendosi Greqia kundër saj. Gjatë luftës së Kosovës në vitin 1999, vendi i varfër pranoi gati 300.000 refugjatë nga Kosova. Në vitin 2001 vetë Maqedonia ishte në pragun e një lufte civile. Vetëm pas zgjidhjes së konfliktit u shënuan hapa në drejtim të integrimit. Në vitin 2005, Maqedonia mori statusin e vendit kandidat për në Bashkimin Evropian, por ende nuk është përcaktuar data për fillimin e negociatave të anëtarësimit. Nga viti 2008 Maqedonia konsiderohet e aftë për t'u anëtarësuar në NATO, megjithatë kjo aspiratë ende nuk është bërë realitet.
Dy probleme themelore ka përballur Maqedonia në këto vite. Konflikti i emrit me Greqinë dhe marrëdhëniet ndëretnike në një shtet multietnik. Me çështjen e dytë, atë të marrëdhënieve ndëretnike, maqedonasit ditën të veprojnë shumë më mirë, se sa vende të tjera në rajon.
Pas konfliktit të armatosur në vitin 2001, Marrëveshja e Ohrit krijoi bazën për bashkëjetesën jo vetëm me shqiptarët, por me të gjitha grupet etnike në vend. Një bazë, e cila nuk është një pamje idilike, por ka krijuar marrëdhënie të pranueshme ndërtetnike, me potencial për zhvillim të mëtejshëm.
Greqia e patundshme në konfliktin e emrit - Gjermania me pozicion pritës
Konflikti me Greqinë përbën ende një problem të pazgjidhur. Në marrëdhëniet ndërkombëtare konsiderohet një rast unikal që një shtet i refuzon një tjetri të drejtën e emrit. Greqia trembet se me emrin Republika e Maqedonisë, mund të ngrihen pretendime territoriale për provincën me të njëjtin emër në Veriun grek. Parlamenti gjerman në një rekomandim të vitit 2004 ka pranuar se do të njohë emrin Republika e Maqedonisë, por deri më sot Berlini i ka mbetur besnik politikës së BE-së.
Gernot Erler, politikan gjerman socialdemokrat, e bëri të qartë: "Berlini nuk mund të bëjë praktikisht asgjë, derisa të zgjidhet problemi me emrin." Mbi konfliktin me emrin, ministri i Jashtëm gjerman. Guido Westerwelle u shpreh në fillim të kësaj jave. "Ne shpresojmë në suksesin e bisedimeve, që zhvillohen mes Greqisë dhe Maqedonisë nën ndërmjetësimin e OKB-së. Unë shpresoj shumë, shpresoj vërtet nga zemra, në interes të maqedonasve por edhe të Evropës që vështirësitë aktuale të tejkalohen. "
Autor: Zoran Jordanovski/Lindita Arapi
Redaktoi: E. Xhani