Në kuartierin sportiv në Frankfurt stërviten rreth 30 arbitra dhe asistentët e tyre. Por më i rëndësishmi si për indinjatën e të gjithëve mungon, sepse të gjithë dëshironin të flisnin me Graham Poll. Njeriu që i ka krijuar probleme shefit të FIFA-s Sep Blater:
"Një gabim i tillë, nuk duhet të ndodhë. Madje as në një situatë të tensionuar s´duhet të ndodhë një gjë e tillë."

Bllokimi i Graham Poll në ndeshjen Kroaci-Australi përbën skandalin më të madh deri më sot në një Kampionat Botëror. Lojtari kroat Simunic u dëbua nga fusha pas kartelës së tretë të verdhë dhe jo sipas rregullit pas të dytës. A është në gjendje të numërojë arbitri Poll, apo si mundi të ndodhë një lapsus i tillë? Vetë Poll hesht, ndaj ai dha vetëm një deklaratë zyrtare përmes zëdhënësit të FIFA-s Markus Siegler: "Arbitri deklaroi përpara komisionit të arbitrave, se tek ka lëshuar kartelën e dytë të verdhë kundër Simunicit gabimisht ka shënuar emrin e lojtarit australian me numrin 3 dhe as gjatë vazhdimit të ndeshjes s´ka arritur ta vërë re këtë ngatërresë."

Ajo që është e pabesueshme në këtë vendim të gabuar është fakti, se as Poll dhe as dy asistentët e tij nuk e kanë kapur këtë gabim: pra kemi të bëjmë me një dështim kolektiv? Si rrjedhojë Poll dhe dy asistentët e tij janë të dëshpëruar, thotë Andreas Verz, mbikqyrës i arbitrave të FIFA-s: "Ata kuptohet që janë jashtëzakonisht të dëshpëruar dhe të zhgënjyer. Në fakt ata s´mund ta kuptojnë, se si ka ndodhur kjo. Ndaj Poll dhe ekipi i tij janë prekur thellë."

Si mund të shmangen në të ardhmen të tilla gabime? Kësaj është e vështirë t´i përgjigjesh. Sepse nëse pesë persona përgjegjës s´janë në gjendje të numërojnë deri në dy, atëherë s´mund të ndihmojë as përzgjedhja më e mirë në konkursin e vështirë dhe të sterholluar të arbitrave. Andreas Verz: "FIFA s´ka përse ta ndjejë veten ngushtë. Gabime do të ketë gjithmonë, do të ketë edhe pas katër vjetësh në Afrikën e Jugut edhe në turne të tjera. Por kuptohet që gabime të tilla të krijojnë shqetësime."

Për Graham Poll dhe ekipin e tij tashmë Kampionati Botëror ka marrë fund. Vendimin do ta japë komisioni i arbitrave të mërkurën (28.06). Në atdheun e tij qysh tani kanë nisur të ironizojnë ndaj Pollit, në Angli po tregohet barsaleta: se "cili është ndryshimi mes Graham Pollit dhe një baterie? Edhe bateria ka një anë pozitive." Por vështirë se Polli mund të habitet prej këtij humori therës.