Sipas një deklarate të përbashkët të Britanisë së Madhe dhe BE të mërkurën, Britania e Madhe do t'i ribashkohet programit Erasmus të Bashkimit Evropian në vitin 2027, pas largimit me Brexitin në vitin 2021.

Programi i shkëmbimit ka qenë shumë i popullarizuar mes studentëve të universiteteve, pasi u lejon atyre të studiojnë për një semestër ose një vit jashtë në një vend tjetër evropian.

Kryeministri britanik Kier Starmer kishte premtuar t'i bashkohej përsëri programit si pjesë e marrëveshjes së rivendosjes së marrëdhënieve të qeverisë së tij me Brukselin.

Rreth 9 milionë vetë kanë marrë pjesë në programin Erasmus që nga nisja e tij në vitin 1987. Ai njihet për krijimin e një brezi britanikësh proevropianë.

Pse u largua Britania e Madhe nga Erasmus?

"Britania e Madhe ka arritur me sukses një marrëveshje për kushtet e bashkimit me programin Erasmus+ në vitin 2027, duke zgjeruar mundësitë për të rinjtë nga të gjitha sfondet, studentët, stafin e arsimit, të rinjve dhe sportit që të studiojnë dhe të trajnohen jashtë vendit," tha qeveria britanike në një deklaratë.

Erasmus+ do t'u lejojë njerëzve në arsimin e lartë dhe trajnimin profesional të përfitojnë gjithashtu nga marrëveshja.

Qeveria Britanike tha se rreth 100.000 vetë mund të përfitonin vetëm në vitin e parë. Ajo shtoi se kostoja për Britaninë e Madhe do të ishte rreth 570 milionë paund (650 milionë euro, 760 milionë dollarë).

Ish-Kryeministri britanik Boris Johnson, i cili udhëhoqi përfundimin e Brexit-it në fillim të vitit 2021, kishte refuzuar mundësinë e mbetjes në programin Erasmus, duke argumentuar se kostot ishin shumë të larta.

Si do të duket bashkëpunimi midis Britanisë së Madhe dhe BE?

Ministri britanik për Marrëdhëniet me BE-në, Nick Thomas-Symonds, tha se marrëveshja për rikthimin është "një fitore e madhe për të rinjtë tanë".

"Kjo ka të bëjë me më shumë se udhëtimet: ka të bëjë me aftësitë e së ardhmes, suksesin akademik dhe me dhënien e aksesit brezit të ardhshëm në mundësitë më të mira të mundshme," shtoi ai.

Komisioneri i BE për Tregtinë, Maros Sefcovic, gjithashtu mirëpriti marrëveshjen si një "hap të madh përpara" për marrëdhëniet me Britaninë e Madhe. BE-ja dëshiron që të dyja palët të shkojnë më tej dhe t'u lejojnë të rinjve të moshës 18 deri në 30 vjeç të studiojnë dhe të punojnë në Britaninë e Madhe dhe në BE.

Universitetet britanike shprehën "entuziazmin" për lajmin

"Me një shtrirje edhe më të madhe se programet e mëparshme, Erasmus+ hap mundësi fantastike për studentët, të rriturit që mësojnë dhe të rinjtë që të përfitojnë nga përvoja të reja dhe mësime," tha Tim Bradshaw, drejtor i Russell Group, i cili bashkon universitetet kryesore të Britanisë së Madhe.

"Ai gjithashtu do të ripërtërijë kontributet e mëdha që studentët dhe stafi i BE japin në jetën në kampuset tona universitare," shtoi ai.