Bundesliga 'pushton' djepin e futbollit
24 Maj 2013![](https://static.dw.com/image/16830950_800.webp)
Të shtunën në mbrëmje, stadiumi Uembli do të pushtohet nga Bundesliga. Borussia Dortmund dhe Bayern Munich, do të luajnë në një nga mbrëmjet më prestigjoze të futbollit. Por një gjë e tillë ka bërë xhelozë anglezët, të cilët mendojnë se kampionati i tyre është më i forti në botë. Por si arriti Bundesliga deri këtu? Për tifozen e Chelsea-it, Leslie Gore përgjigja është shumë e thjeshtë. "Ata kanë bërë një lojë më të qëndrueshme. E meritojnë. Kanë arritur rezultate të mira."
Ekipet gjermane mbretërojnë mbi klubet e fuqishme të Premier League si Manchester United, Manchester City dhe kampionët në fuqi të Champions League, Chelsea. Në të vërtetë Premier League rënditet mirë në rang ndërkombëtar për shkak të numrit të lartë të biletave të shitura, të ardhurave nga reklamat dhe shitja e bluzave të lojtarëve.
Por pse nuk përfaqësohet në finalen e Champions League? Pse Bundesliga shihet si më e forta e muajit ose siç thonë disa më e forta, e dhjetë viteve të ardhshëm? Gregory Akinyode është një tjetër tifoz i Chelsea. "Ata kanë luajtuar shumë mirë në Kampionatin Europian dhe Kupën e Botës. Ata kanë të rinj shumë të talentuar në skuadër", thotë ai.
Të rinjtë çelsi i suksesit
David Moyes është trajneri i ardhshëm i kampionëve të Premier League, Manchester United, dhe një tifoz i Bundesligës. Ai ka thënë për një gazetë londineze se Bundesliga tani është duke shijuar frytet e investimeve në zhvillimin e talenteve të rinj.
"Ekipet e tyre të të rinjve dhe mënyra e organizimit është shumë e mirë. Gjermanët kanë bërë një organizim si duhet", ka thënë Moyes. Fakti që Gjermania mban titullin e kampiones së Europës në moshat Under-17, 19 dhe 21, tregon shumë për punën që bëhet me të rinjtë.
Gazetari Raphael Honigstein, i cili shkruan pëe gazetën Guardian dhe radion TalkSport, thotë se nuk është aspak i surprizuar nga ky sukses i Bundesligës. "Problemi më i madh i Premier League-ës është globalizimi. Klubet e kanë më të lehtë të blejnë një 25 vjeçar me eksperiencë nga jashtë se sa të mbështeten tek talenti i një 18 vjeçari vendas."
"Të pasurit nuk bërtasin shumë në stadium"
Çmimet e biletave për të parë një ndeshje të kampionatit gjerman janë shumë më të lira në krahasim me atë anglez. Mijra bileta mund të prenotohen me një çmim nga 10 deri në 15 euro në Bundesligë, ndërsa për një ndeshje të Chelsea përshembull bileta më e lirë kushton 50 Euro.
"Këto çmime nuk afrojnë njerëzit e thjeshtë në stadium. Prandaj gjithmonë shohim një grup njerëzish dhe pak pasion", thotë Thymios Kyriakopoulos, i cili prej 11 vitesh ndjek ndeshjet e skuadrës së Chelsea.
Gazetari londinez Barney Ronay, pas një prej vizitave të shumta në stadiumin e Bayern Mynich shkruante se në stadiumet gjermane ka më shumë pasion dhe fansa të vërtetë. Finalja e Champions League do të jetë një ndeshje e vërtetë Bundeslige. "Por UEFA nuk do të njohë konceptin gjerman të biletave të lira dhe fansat janë të nxehur për këtë fakt", thotë ai për DW.