Kryeministri britanik David Cameron i ra fillimisht fort daulles së luftës pastaj e zbuti planin e tij për një aksion ushtarak kundër regjimit të presidentit Bashar al-Asad. Por pa dobi. Me 285 vota pro dhe 272 kundër dhoma e ulët e parlamentit në Londër kundërshtoi hapat ushtarakë, me të cilët duhej të parandaloheshin sulmet e mëtejshme me gaz helmues nga regjimi i Asadit.

Në diskutimin në parlament Cameron bëri të qartë, se fjala nuk është as për një invazion dhe as për një ndryshim të regjimit, por për një aksion dënues për sulmin e kryer me armë kimike. Por jo vetëm partia opozitare laburiste, edhe vetë deputetët e partisë së e tij konservatore kërkuan prova bindëse për përdorimin e armëve kimike nga regjimi i Asadit.

Përsëri pa marrëveshje në Këshillin e Sigurimit

Më në fund Cameronit nuk i mbeti gjë tjetër, veçse të pranojë humbjen. Parlamenti e bëri të qartë me votën e tij, se ai nuk dëshiron një aksion ushtarak britanik, tha kryeministri pas votimit. Cameron tha se e respekton vullnetin e Dhomës së Komuneve.

"Unë besoj fuqimisht në nevojën për një përgjigje të ashpër ndaj përdorimit të armëve kimike, por unë gjithashtu besoj në respektimin e dëshirave të Dhomës së Komuneve", u shpreh Cameron. "Për mua është e qartë se parlamenti Britanik, duke reflektuar pikëpamjet e popullit britanik, nuk do të shikojë një ndërhyrje ushtarake britanike. Unë e pranoj këtë dhe qeveria do të veprojë në përputhje me rrethanat."

Më parë pesë anëtarët e përhershëm të Këshillit të Sigurimit të OKB-së nuk kishin mundur të arrinin një qëndrim të përbashkët as në diskutimin e tyre të dytë për projektrezolutën britanike.

Ambasadorët e Kinës, Francës, Britanisë së Madhe, Rusisë dhe SHBA-së e ndërprenë takimin pas më pak se një orë, pa dashur të japë asnjëri asnjë koment.

Shtypi: Obama i gatshëm për të vepruar i vetëm

Jemi informuar mbi rezultatet e votimit parlamentar në Britaninë e Madhe, deklaroi zëdhënësja e Këshillit Kombëtar të Sigurisë, Caitlin Hayden, në Uashington. SHBA vazhdon të qëndrojë në lidhje me qeverinë britanike. Por presidenti Barack Obama me vendimin e tij do të bëjë atë, që "është në interes të SHBA", tha ajo.

Sipas një raporti në "New York Times" presidenti është me sa duket i gatshëm për një veprim unilateral ushtarak në Siri. Obama nuk do të presë Britaninë e Madhe për një operacion të mundshëm ushtarak, shkruan gazeta, duke cituar burime qeveritare.