Demokrati Zohran Mamdani fitoi zgjedhjet për kryetar bashkie në Nju Jork. Ai do të jetë i pari kryetar bashkiak mysliman i metropolit. Mamdani fitoi ndaj ish-guvernatorit Andrew Cuomo dhe republikanit Curtis Sliwa. Më shumë se dy milionë njerëz dhanë votën, sipas Komisionit Zgjedhor të Qytetit të Nju Jorkut. Kjo ishte pjesëmarrja më e lartë në zgjedhje që nga viti 1969.

Kundërshtarët e Mamdanit e akuzonin, ndër të tjera, për mungesë përvoje. Për më tepër, kritikat herë pas here tejet të ashpra të Mamdanit ndaj qeverisë izraelite hasën në mosmiratim nga pjesë të popullsisë hebraike të Nju Jorkut. Në fjalimin e fitores, Mamdani theksoi se do të luftijë antisemitizmin dhe iu drejtua drejtpërdrejt Presidentit Donald Trump, duke kritikuar ashpër politikat e administratës aktuale amerikane për imigracionin dhe deportimin. "Në këtë moment errësire politike, Nju Jorku do të jetë drita", tha Mamdani në një aktivitet në lagjen Bruklin të qytetit të Nju Jorkut.

Mamdani e përshkruan veten si një socialist demokrat. Në moshën 34 vjeç, ai do të jetë kryetari i bashkisë më i ri i qytetit prej më shumë se një shekulli. Gjatë fushatës së tij zgjedhore, ai premtoi të ulë koston e tepërt të jetesës në metropol. Ai planifikon të zbatojë kontrollin e qirasë, autobusë falas dhe kujdes falas për fëmijët. Kjo do të financohet nga taksat më të larta për të pasurit dhe korporatat. Ish-Presidenti Barack Obama i përgëzoi demokratët për fitoren e tyre. "Kemi ende shumë punë përpara, por e ardhmja duket pak më e çelur", shkroi Obama në shërbimin online X. Senatori i krahut të majtë Bernie Sanders deklaroi në X se Mamdani kishte arritur "një nga trazirat më të mëdha politike në historinë moderne amerikane".

Demokratët festojnë pas zgjedhjeve në dy shtetet federale në SHBA

Demokratët në SHBA kanë shënuar fitoren e parë të madhe që kur Presidenti Donald Trump mori detyrën. Nëntë muaj pas fillimit të mandatit të dytë të republikanit, partia fitoi në shtetet federale të Virxhinias dhe Nju Xhersit. Demokratët shënojnë tani guvernatorët e Virxhinias me Abigail Spanbeger dhe Nju Xhersit me Mikie Sherill. Ndërkohë edhe në Nju Jork, i sapoardhuri në politikë, Zohran Mamdani, fitoi zgjedhjet për kryetar bashkie. Partia e guvernatorit Gavin Newsom arriti gjithashtu një rezultat historik në Kaliforni. Zgjedhjet në shtetet federale shiheshin si test edhe për politikën e presidentit, Donald Trump.

 

 

la/ag