Më në fund zhbllokohet situata politike në Kuvendin e Kosovës. Deputetët e Kuvendit të Kosovës,  zgjodhën të martën (26.08) kryetarin e ri të Kuvendit, deputetin e Lëvizjes Vetëvendosje, Dimal Basha. Zgjedhja e Dimal Bashës si kryeparlamentar i hap tani rrugën konstituimit të plotë të Kuvendit me zgjedhjen e kryesisë dhe pastaj formimin e qeverisë së re. Kryetari i ri i Kuvendit të Kosovës, Dimal Basha, mori 73 vota pro, 30 kundër dhe tre abstenime.

Basha bën thirrje për lënien mënjanë të ndasive politike

Kryetari i ri i Kuvendit të Kosovës, Dimal Basha falënderoi deputetët që i dhanë votën dhe u shpreh me mirënjohje. “E ndjej nderin për votën dhe mbështetjen tuaj, njëkohësisht e ndjej edhe përgjegjësinë që më është dhënë. Ky institucion është zemra e demokracisë tonë, vendi ku përfaqësohen zërat e të gjithë qytetarëve tanë." Ai tha se e mirëpret debatin dhe pret dallime "po gjithmonë të udhëhequr drejt një Kosovë të fortë." Kryetari i ri i Kuvendit të Kosovës bëri thirrje për lënien mënjanë të ndasive në politikën e vendit. 

Dimal Basha (i lindur në vitin 1979 në Prishtinë dhe që jeton në Ferizaj) është zgjedhur në këtë lesgjislaturë për herë të tretë si deputet i Kuvendit të Kosovës. Më parë ka qenë anëtar në Komisionin Parlamentar për Punë të Jashtme, Komisionin për Legjislacionin, Komisionin për Mbikëqyrjen e AKI-së dhe Komisionin për Stabilizim-Asociim në Kosovë. 

Zgjedhja e kryetarit të Kuvendit të Kosovës, u bë pas gjashtë muajsh ngërçi politik dhe mungesës së tejzgjatur të konsensusit ndërmjet partive politike parlamentare. Në 57 seancat e zhvilluara nga Kuvendi i Kosovës pas zgjedhjeve të 9 shkurtit 2025, asnjëri prej kandidatëve të mëparshëm Albulena Haxhiu, Hekuran Murati, Arbërie Nagavci dhe Donika Gërvalla-Schwarz nuk ia dolën të marrin më shumë se 57 vota. Kandidatja që u refuzua më shpesh dhe më së shumti u propozua nga Lëvizja Vetëvendosje ishte Albulena Haxhiu.