310709 interview riecke eta anschläge
31 Korrik 2009DW: Z. Riecke përse pikërisht ky sulm në Majorka?
Riecke: "Majorka është një ndër rajonet kryesore të udhëtimeve në Spanjë, aeroporti i Majorkës është i treti për nga madhësia në vend. ETA tradicionalisht ka përzgjedhur sezonin e pikut të turizmit për të goditur me sulme terroriste qeverinë dhe politikën spanjolle. Turizmi është një faktor i rëndësishëm ekonomik dhe për këtë arësye edhe mjaft i ndjeshëm."
DW: Askush nuk e ka marrë deri tani përgjegjësinë për atentatin. Por të gjithë mendojnë se pas tij qëndron ETA. Përse pikërisht ETA?
Riecke: "Për këtë flet kryesisht fakti, që viktimat e sulmeve terroriste në Majorka dhe një ditë më parë në Burgos në Veri të Spanjës janë policë si dhe të afërm e familjarë të policëve të Gardës Civile. ETA ndodhet aktualisht në një fazë që do të tërheqë vazhdimisht vëmendjen. Qysh prej dy muajsh në rajonin e baskëve ka një qeveri të re rajonale, e cila drejtohet nga një socialist dhe jo më nga një nacionalist. Vitin e kaluar u arrestuan shumë anëtarë drejtues të ETA-s. Si rrjedhojë mund të thuash se ETA vërtetë është dobësuar, por njëkohësisht ajo do të sulmojë përsëri."
DW: Një gjysmë shekulli pas themelimit, sa mbështetje vazhdon të ketë ETA nga popullsia në rajonin e baskëve?
Riecke: "ETA është themeluar si një lëvizje rezistence kundër Frankos dhe për këtë jo vetëm në Spanjë, por edhe në botën e jashtme në fillim ajo gëzonte simpati. Por qëkurse Spanja është demokraci shumica e spanjollëve nuk e kuptojnë më pse ETA përdor dhunë. Edhe në rajonin e baskëve ajo e ka humbur mbështetjen për luftën e armatosur. Po ashtu edhe në radhët e ETA-s ka shumë, që kërkojnë bisedime dhe afrimin me qeverinë. Ndaj në këtë moment ekziston kjo situatë dobësie. Vitin e kaluar u arrestuan pesë udhëheqës të ETA-s. Në aspektin politik ETA nuk është më e fortë. Por që ajo është e dobët nuk do të thotë, se ajo është e parrezikshme, sepse luftrat që zhvillohen brenda ETA-s mund të nxisin sërish frymën për të tërhequr vëmendjen përmes atentateve."
Autor: Kerstin Dauzend/DW-TV/Vilma Filaj Ballvora
Redaktoi: Auron Dodi