Fondi Monetar Ndërkombëtar sheh të rrezikuar rimëkëmbjen e ekonomisë botërore. Për këtë arsye ai ka korigjuar duke ulur me 0,75 për qind parashikimin e tij për rritjen ekonomike globale, në krahasim me prognozën e shtatorit 2011. Rritja e ekonomisë globale sipas raportit të fundit të Fondit do të jetë 3,25 për qind. "Arsyeja është kryesisht që për Evropën këtë vit presim një recesion të butë", tha kryeekonomisti i FMN-së Olivier Blanchard të martën (24.01.2012) në Uashington.

Por edhe rritja e shpejtë e vendeve në ekspansion industrial do të ngadalësohet, tha Blanchard. Shkak është "përkeqësimi i mjedisit të jashtëm por edhe i kërkesës së brendshme për këto vende".

"Rimëkëmbja globale është në stanjacion, rreziqet e rënies po shtohen", kështu e titullon FMN raportin e tij të aktualizuar tremujor "World Economic Outlook". Për Fondin është e qartë edhe se kush është shkaktarja e premisave më të errëta të rritjes ekonomike: kriza e borxheve në Eurozonë. "Sfida imediate politike është rivendosja e besimit të tregjeve në Eurozonë dhe dhënia fund krizës", tha Blanchard.

Frenuesit e rritjes: masat e kursimeve dhe ngushtica në kredidhënie

Dy frenues të rritjes ekonomike sheh Blanchard në Eurozonë. Shumë shtete janë të detyruara të rimëkëmbin buxhetet dhe të zvogëlojnë borxhet, por nëse masat e marra për këtë qëllim janë shumë të forta, ato mund të frenojnë rritjen. Megjithatë jo të gjitha shtetet e Eurozonës janë në të njëjtën situatë. Disa vende janë në një pozitë më të favorshme se të tjerat dhe duhet të ecin më ngadalë me masat e konsolidimit të buxhetit, për të mos rrezikuar rritjen ekonomike.

Së dyti, bankat duhet të marrin më shumë masa për përballimin e krizës dhe të pajisen me më shumë kapital bazë. Por kjo nuk duhet të arrihet nëpërmjet kufizimit të kredidhënies nga bankat. Përkundrazi, duhet bërë gjithçka për shmangien e një ngushtice kredish dhe pasojat e saj shkatërrimtare në ekonominë reale. Për këtë arsye Banka Qendrore Evropiane duhet të vazhdojë të ofrojë likuiditet të mjaftueshëm dhe të mos ndërpresë programin e saj për blerjen e obligacioneve shtetërore, këshillon FMN.

Rreziku i përhapjes së krizës

Për SHBA-në Fondi parashikon një rritje të dobët prej vetëm 1,8 për qind, ndërsa Eurozona do të tkurret në total me 0,5 për qind. Kjo ka pasoja edhe tek vendet në ekspansion industrial, thotë kryeekonomisti i FMN-së Olivier Blanchard: "Këto vende tashmë janë prekur. Kur në vendet e industrializuara ekonomia paralizohet, bie edhe niveli i tregtisë me vendet në ekspansion dhe ato mund të eksportojnë më pak." Kësaj i shtohet edhe pasiguria financiare: "Vendet në ekspansion do të përballen me flukse parash tejet të luhatshme. Kjo ndoshta nuk do të rezultojë katastrofale, por problemi do të paraqitet."

Ekonomitë e zhvilluara sipas të dhënave të FMN-së do të rriten mesatarisht 1,5 për qind gjatë këtij viti. Pas rënies drastike në vitin e krizës 2009, kjo rritje është shumë e vogël për të luftuar me efikasitet papunësinë, thotë Blanchard: "Ne kemi nevojë për rritje të fortë. Pa rritje të fortë nuk mund të bësh shumë kundër papunësisë. Ajo mund të zbutet dhe është e rëndësishme të mbështeten ata që janë për një kohë të gjatë të papunë. Por duhet të jemi realistë: rritja e fortë ekonomike është rruga e vetme."

Autor: Rolf Wenkel / E. Xhani

Redaktoi: Elert Ajazaj