Minuta e 56 e gjysmëfinales Francë-Belgjikë. Sulmuesi francez Kylian Mbappé e ndalon topin në zonën e rreptësisë me këmbën e djathtë, ndërsa me dhembrën e këmbës së mbajtë e çon në drejtim të bashkëlojtarit. E gjitha zhvillohet kaq shpejtë sa që të kujton një perfeksionizëm në futboll. Bashkëlojtari Olivier Giroud, nuk arriti të shënojë nga ky aksion, por kjo skenë tregon gjithë potencialin që ka Equipe tricolore, i cili në ndeshjen e gjysmëfinales mundi me meritë Belgjikën dhe u kualifikua për finalen e madhe që do të mbahet ditën e dielë.

Mbrojtja e fuqishme

Mbappé është vetëm 19 vjeç dhe konsiderohet si talenti më i madh i futbollit. Ai ka potencial që një ditë të bëhet pasardhësi i yjeve të tanishme, Cristiano Ronaldo apo Lionel Messi. Por ajo që e ka dërguar Francën deri në finale është në fakt mbrojtja shumë e fuqishme. Madje edhe golin vendimtar kundër Belgjikës e shënoi një mbrojtës - Samuel Umtiti. Trajneri Didier Deschamps e ka kuptuar se kampionatet fitohen vetëm me një mbrojtje të fuqishme dhe jo me lojë atraktive. Edhe në ndeshjen me Belgjikën u koncentrua tek ruajtja e golit të vet, ndërsa kundërshtarin më së shumti rrezikonte me kundërsulme.

"Les Bleus" kanë dëshmuar gjatë këtij Kampionati Botëror se kanë edhe sulmues të jashtëzakonshëm, të cilët brenda pak sekondash mund të arrijnë nga gjysmëfusha e tyre deri tek goli i kundërshtarit. Ata ndihmohen nga mesfushorët shumë të mirë. Lojtarët si Paul Pogba, Antoine Griezmann dhe natyrisht Mbappé janë në gjendje të mposhtin çdo mbrojtje të kundërshtarit.

Koordinimi i mirë

Trajneri i kombëtare franceze Deschamps ka arritur që në këtë kampionat të koordinojë mirë lojtarët me përvojë me ata të rinj, të cilët janë të etur për suksese. Dhe pavarësisht se kush do të jetë kundërshtar të dielën - Kroacia apo Anglia - Equipe tricolore konsiderohet favorit për të fituar titullin e kampionit të botës. Do të ishe kjo hera e dytë, pas vitit 1998. Por edhe kundërshtari në finale me siguri që do të përpiqet të gjejë rrugën e fitores.