Gjurmë frenash në tregun gjerman të punës
28 Shtator 2012![Arbeitslosenzahlen September 2010 ARCHIV - Ein Mann geht am 28.05.2009 in Köln an der Agentur für Arbeit vorbei. Am Donnerstag (30.09.2010) gibt die Bundesagentur für Arbeit in Nürnberg die Arbeitsmarktdaten für den Monat September 2010 bekannt. Foto: Oliver Berg dpa/lby +++(c) dpa - Bildfunk+++](https://static.dw.com/image/16131223_800.webp)
Një lajm i mirë dhe një lajm i keq. Agjencia Federale e Punësimit (BA) njoftoi të enjten (2012/09/27) në Nuremberg se në vjeshtë tregu i punës pati sërish gjallërim dhe numri i të papunëve në shtator ra me 117.000 kundrejt muajit të kaluar. Lajmi i keq: Rënia për periudhën e vjeshtës dhe muajin shtator ishte më e ulët se zakonisht. BA njoftoi se gjithsej ka të regjistruar rreth 2.9 milionë të papunë, pra vetëm 7.000 më pak se një vit më parë.
"Këto janë efektet e para të procesit të rënies ekonomike, e cila ka një kohë që po vazhdon", thotë Holger Schäfer, ekspert i tregut të punës në Institutin e Ekonomisë Gjermane (IW). "Tregu i punës çalon pas zhvillimit ekonomik, zakonisht rreth një gjysmë viti më vonë. Dhe tani po duken shenjat e ngadalësimit të koniunkturës ekonomike, që kishin qenë të dukshme që në fillim të vitit."
Gatishmëria për të punësuar po bie
Nën ndikimin e pasigurisë ekonomike shumë kompani gjermane po i pezullojnë një herë për një herë planet e tyre. Numri i vendeve të punës në shtator ka rënë për shkak të shenjave të dobësisë të muajve të mëparshëm, njofton BA. Shefi i Agjencisë Federale e Punësimit Frank-Jürgen Weise thotë se vrulli në tregun e punës është zbehur , por ai nuk dëshiron të flasë në mënyrë eksplicite për një prirje. Për shkak se aktualisht ende po hapen më shumë vende të reja pune, se sa mbyllen të vjetra - dhe kjo në të gjithë sektorët me përjashtim të industrisë bankare dhe shërbimit civil.
"Këtë nuk e prisnim dhe ky është një zhvillim i mirë", thotë shefi i BA-së. 41,6 milionë të punësuar raportoi Zyra Federale e Statistikave në Wiesbaden për shtatorin - rreth 423.000 ose një për qind më shumë se një vit më parë. Dinamikë në rënie në tregun e punës, pavarësisht nga një rritje punësimit - si bëhet kjo?
Numri i vendeve të punës rritet megjithatë
"Këtë fenomen ne po shohim prej mjaft kohësh," thotë eksperti i tregut të punës Holger Schäfer. "Ka shumë njerëz që punësohen dhe që më parë nuk kanë qenë të regjistruar kurrë si të papunë." Së dyti, shumë vende të reja mbushen nga emigrantët. "Kjo do të thotë se mbushen vende të reja pune, pa çuar në një rënie të papunësisë në të njëjtën masë."
Edhe pse numri i të punësuarve që prej fillimit të vitit po bie ndjeshëm, sipas ekspertëve nuk ka ndonjë rrezik për krizë në tregun e punës.