Ministri i Jashtëm gjerman, Guido Westerwelle ka përshëndetur urdhërarrestin e lëshuar kundër pushtembajtësit libian, Muammar al Gaddafi. Në Berlin ai tha se vendimi është një sinjal i qartë se diktatorët dhe dorasit e tyre nuk qëndrojnë jashtë ligjit. Ndërsa Sekretari i Përgjithshëm i NATO-s, Anders Fogh Rasmussen bëri fjalë në Bruksel për një izolim gjithnjë e më të dukshëm të regjimit në Tripoli. Ministri i Jashtëm britanik, William Hague kërkoi nga të besuarit e Gaddafit, ta braktisin atë ose të dalin para drejtësisë. Në qendrën e kryengritësve, Bengasi, vendimi i Gjykatës Penale Ndërkombëtare u prit me brohorima dhe të shtëna gëzimi.

Kryegjyqtari Luis Moreno-Ocampo e akuzon Gaddafi-n për krime kundër njerëzimit

Gjykata Ndërkombëtare Penale vendosi të hënën (27.06.2011) të lëshojë urdhërarresti për kreun e shtetit të Libisë, Muammar al-Gaddafi. Kryeprokurori Luis Moreno-Ocampo akuzon Gaddafin për krime kundër njerëzimit. Ai ka urdhëruar personalisht sulmet kundër civilëve, tha Moreno-Ocampo, i cili ka kërkuar lëshimin e urdhërarrestit edhe për djalin e Gaddafi-t, Saif el Islam dhe kreun e shërbimit sekret libian. Lidhur me vendimin, Fadi al Abdallah nga zyra e shtypit të Gjykatës Penale u shpreh: Bëhet fjalë për një urdhërarrest, i cili nuk është as mjet politik dhe as ndonjë lloj mjeti tjetër presioni. Është thjesht një vendim juridik, i cili nuk ka lidhje me politikën aktuale. Përsa i përket kohës, pse tani jo më më parë, kjo lidhet thjesht me punën e mirë të gjykatësve, të cilët kanë marrë kohën që iu është dashur, për të verifikuar provat, që iu janë paraqitur."

Autor: L.Arapi (dpa/reuter)

Redaktoi: V.Filaj-Ballvora