Me zënien e vendit të dytë në Kampionatin Evropian të Basketballit, që u zhvillua në Beograd, Gjermania arriti një sukses që ishte larg parashikimeve edhe më optimiste.

E udhëhequr nga ylli i saj i vetëm në NBA, Dirk Nowitzki i Dallas Mavericks, skuadra mundi në gjysmëfinale Spanjën me një pikë epërsi. Por marrja e titullit kampion nuk qe i mundur në sajë të një loje shumë të pjekur të Greqisë, fituese në finale, e cila e zotëroi takimin që në minutat e para dhe në fund e mbylli me rezultatin 62:78.

Suksesi më i madh për gjermanët mbetet pra titulli kampion i Evropës, i fituar në vitin 1993 në Mynih. E megjithatë trajneri i kombëtares gjermane, Dirk Bauermann e vlerëson shumë arritjen e vendit të dytë:

"Fantastike. Ajo që arriti skuadra jonë këtu është vërtet për tu lavdëruar." - por ai pranon, se me mbërritjen në finale, çdo ekip synon vetëm fitimin e titullit.

Duhet thënë se Nowitzki, i cili u zgjodh edhe lojtari më i mirë i kampionatit, nuk mundi të paraqiste formën e tij të zakonshme, ndoshta për shkak të lodhjes nga minutat e shumta, që iu desh të luaj në takimet e mëparshme.

Pikëshënuesi më i mirë i Greqisë ishte me 22 pikë Theodoros Papaloukas.

Pikëshënuesi më i mirë i Greqisë: Theodoros Papaloukas.

Përveç vendit të dytë, Gjermania ka arsye të festojë edhe kualifikimin për në Kampionatin Botëror të vitit të ardhshëm në Japoni, si dhe për Kampionatin Evropian 2007 në Spanjë.