Vitin e kaluar Turqia përfitoi shumë nga ndikimi i pranverës arabe. Numri i turistëve u rrit duke sjellë rritjen e të ardhurave. Por këtë vit ka rënie në numrin e rezervimeve.

Në Greqi, në rivalen kryesore të turizmit turk, ndikimi i përkeqësimit të krizës ekonomike po ndryshon profilin turistik. Në një kohë që nga gjendja politike dhe ekonomike në Greqi janë shtuar ndjenjat antigjermane, ka të ngjarë që më pak turistë gjermanë të vizitojnë ishujt e Egjeut këtë verë. Megjithatë shpresat janë ende të larta në sektorin e turizmit, pasi vendi po përfiton nga një rritje e konsiderueshme e numrit të turistëve rusë.

Greqia pret rreth 1 milion turistë rusë këtë vit, që do të thotë dyfishim i numrit të vitit 2010. Javorja britanike "The Economist" ka përmendur simpatinë në rritje të rusëve ndaj Greqisë, në një artikull të fundit me titullin: "Një miqësi ortodokse."

Sipas gazetës javore lehtësimi i rregulloreve të vizave me Rusinë ka bërë që të rritet turizmi i rusëve në Greqi. Shumë rusë janë duke blerë shtëpi të dyta në rrethin e Halkidikisë në veri të Greqisë. Mali Athos aty pranë, me manastiret e murgjve ortodoksë, tërheq gjithashtu shumë turistë rusë.

Me sa duket, ndërsa Greqia po tërheq më shumë turistë rusë, pjesa e turizmit turk është në rënie. Sipas statistikave të fundit zyrtare të Ministrisë së Turizmit dhe Kulturës të Turqisë numri i turistëve rusë, që kanë vizituar vendin në tre muajt e parë të këtij viti, ka rënë 7 për qind, krahasuar me të njëjtën periudhë të vitit të kaluar. Në tremujorin e parë të vitit 2012, rreth 165.000 rusë vizituan Turqinë. Në tremujorin e parë të vitit 2011 ishin 179.000.

Tregu rus i turizmit është jashtëzakonisht i rëndësishëm për Turqinë, e cila hyn në shtatë destinacionet kryesore të turizmit botëror. Vitin e kaluar 3.5 milionë turistë rusë shkuan në Turqi, ndërsa numri i turistëve gjermanë, përfshirë turqit me pasaportë gjermane, ishte rreth 4.8 milionë. Në total 36 milionë turistë sollën 23 miliardë dollarë amerikanë të ardhura për vendin.

Sipas Asude Onal, drejtore marketingu e Anex Tour, ka një rënie të dukshme në numrin e rezervimeve dhe numrit të turistëve rusë, që vizitojnë Turqinë në muajt e parë të këtij viti. "Por kjo jo për shkak se Turqia po e humb atraktivitetin e saj në sytë e rusëve," i tha Onal DW. "Turistët rusë zgjedhin disa destinacione të tjera, të cilat janë relativisht më të lira në krahasim me Turqinë", thotë ajo.

Sipas operatorëve turistike konkurrentët kryesorë të Turqisë, që po tërheqin gjithnjë e më shumë turistë, janë Tajlanda, Spanja dhe Greqia. "Veçanërisht në rajonin tonë shumë vende janë duke i dhënë mbështetje të fuqishme sektorit turistik të tyre", thotë Onal. "Duke ulur çmimet. Dhe nga vendet si Rusia, turistët preferojnë gjithnjë e më shumë këto vende", thekson ajo.

Të ardhurat e Turqisë nga turizmi kanë rënë në tre muajt e parë të këtij viti. Me një humbje prej 299 milionë dollarë amerikanë në krahasim me vitin e kaluar, operatorët e turizmit turk kanë përfituar 2801 milionë dollarë amerikanë.
Pavarësisht nga këto shifra dekurajuese, operatorët e turizmit në Turqi nuk presin që rezervimet dhe të ardhurat të bien më tej, ata presin rritje në muajt e ardhshëm. Ato gjithashtu shpresojnë që të kenë rritje të numrit të turistëve rusë.

"Rusia është një treg i madh për ne. është e kuptueshme, që vende të tjera konkurrojnë për të marrë një pjesë më të madhe të këtij tregu", i thotë DW Ayhan Bektaş, kryetari i kompanisë kryesore të turizmit OTI, duke iu referuar rritjes së interesit të rusëve për Greqinë. “Por ne duhet të shohim se turiqa është bërë destinacion i turizmit masiv. Ne presim që turizmi turk të vazhdojë të rritet këtë vit, edhe pse nuk presim që kjo rritje të jetë më e madhe, se c'ka qenë në vitet e mëparshme."

Viti 2011 ka qenë një vit i jashtëzakonshëm për operatorët e turizimit turk me një ndikim relativisht pozitiv të pranverës arabe. Në sektorin turk të turizmit pati një numër të lartë rezervimesh paraprake.

"Këtë vit në fillim të sezonit, numri i rezervimeve paraprake, që u kanë ardhur operatorëve tanë është gati i njëjtë me një vit më parë." Bektaş thotë. “Ne presim rritje të mëtejshme gjatë qershorit dhe korrikut. Qëllimi ynë është të arrijmë një rritje prej 10 përqind në fund të këtij viti.”

Autor: Selçuk Oktay/A Verbica