Presidenti francez Francoise Hollande i ka bërë thirrje Greqisë që të dëshmojë "kredibilitetin" e përpjekjeve të saj për reforma. Pas takimit një-orësh me kryeministrin Antonis Samaras, Hollande foli për një situatë të vështirë për këtë vend. Pa shpresë është duke u zhdukur kohezioni social në Evropë.

Për kërkesën e Greqisë për zbutjen e paketës së kursimeve ai po ashtu ishte i rezervuar, sikur që ishte të premten kancelarja gjermane Angela Merkel gjatë vizitës së Samarasit në Berlin. Greqia dëshiron të ketë dy vjet kohë për të filluar me zbatimin e reformave. "Një sukses grek është një sukses evropian", tha kryeministri grek.

Hollande angazhohet për vendime të shpejta

Në përpjekjet për të ardhmen e anëtarit të eurozonës të futur thellë në borxhe Hollande kërkoi një vendim të shpejtë. Vendimi duhet të merret sapo të jetë gati raporti i Trojkës së kreditorëve, Komisionit Evropian, Bankës Qendrore Evropiane dhe Fondit Monetar Ndërkombëtar. Raporti i Trojkës pritet të prezantohet në samitin e BE-së në tetor.

Çështja e mbetjes së Athinës në Unionin Monetar nuk u përmend. Qeveria greke, megjithatë, duhet të dëshmojë vendosmërinë e saj  për të arritur qëllimet e saj. Samaras tha se Greqia do të mbajë euron, edhe pse "disa ende vazhdojnë të spekulojnë kundër Greqisë".

Merkel të premten në një bisedë me Samaras-in ka insistuar në respektimin rigoroz të afateve të dakorduara me donatorët ndërkombëtarë. Edhe Merkel si Hollande, tha se 17 vendet anëtare të eurozonës duhet të presin derisa e ashtuquajtura Trojka të nxjerrë raportin për Greqinë para se të merren vendime të reja. Ajo gjithashtu është shprehur për mbetjen e Greqisë në eurozonë duke sqaruar se ajo nuk njeh askend në koalicionin qeveritar që nuk e dëshiron një gjë të tillë.