Gjermania dhe Britania e Madhe nga Perëndimi si dhe rusët dhe ukrainasit nga Lindja dominuan aktivitetin që përfundoi në fundjavë.

Polonia ka avancuar vitet e kaluara në një shoqëri ambicioze konsumi dhe prej kësaj ka përfituar edhe tregu i librit. Këtë të paktën e sugjeron statistika, sipas së cilës, si xhiroja e kësaj dege ekonomike, fitimet dhe tirazhi i përgjithshëm i librave të botuar më 2007-ën ishte më i lartë se një vit më parë.

Albrecht Lemp, përkthyes, ekspert i tregut të librave dhe drejtues i Fondacionit për bashkëpunimin gjermano-polak me qendër në Varshavë: "Pa dyshim që tendenca është në ngjitje, si kudo në ekonominë polake. në mënyrë shumë të qartë, shumë njerëz, sapo kanë më shumë para në xhepa, blejnë prapë libra. Të gjitha këto nuk janë vlerësuar në mënyrë kaq ekzakte. Po të flasim për tregun e librit dhe nga ana tjetër të mendojmë si humanistë për literaturën artistike, kemi të bëjmë me dy gjëra të ndryshme. Tregu i librit është fort edhe libri i gatimit, si e riparoj unë makinën time, si e riparoj gruan time e kështu me radhë...Dhe pastaj ekziston edhe një segment i vogël i letërsisë artistike, i cili është për shumë njerëz shumë i rëndësishëm si temë."

Panairi Ndërkombëtar i Librit në Varshavë nuk ishte vetwmw pazar shitjeje i tregtisë ndërkombëtare të licensave. Njëkohësisht ai iu kushtua letërsisë bashkëkohore- para së gjithash asaj polake. Autorë të njohur në botë prezantuan librat e tyre më të rinj: Olga Tokarcuk, Jerzy Pilch ose Hana Krall.

Hana Krall, mjeshtra e admiruar nga të gjithë për letërsinë e reportazhit që operon me forma minimaliste, ka ndikuar ndërkohë me formën e saj një brez më të ri autorësh polakë, të cilët po korrin sukses të madh në Poloni. Albrecht Lemp i përkthen dhe i nxit këta autorë.

"Në traditën e Hana Krall-it është për mua Vojcieh Tochmann, shkrimtari aktualisht më i rëndësishëm i këtij zhanri- reportazhe letrare nga brezi më i ri. Ai pasqyron aktualisht edhe konfliktin me katolicizmin e thellë, që përshkon këtu shoqërinë, dhe si sillet kisha katolike përballë sfidave të ndryshme. Ndihet natyrisht konflikti midis pretendimit dhe realitetit."

I ftuar nderi i Panairit të Varshavës ishte këtë vit Izraeli, me rastin e 60 vjetorit të themelimit të shtetit dhe për një arsye tjetër: 40 vjet më parë, udhëheqja komuniste inskenoi një fushatë antisemite, si pasojë e së cilës 30 mijë të mbijetuar të Holokaustit dhe pasardhës të tyre u detyruan të emigronin nga Polonia. Autorë izraelitë, si tregimtarja e lindur në Krakov, Alona Frankel ose diplomati me origjinë nga Lindja e Polonisw, Scevah Weis kishin marrë me vete librat e tyre në një përkthim më të fundit në polonishte.