Komisioni Evropian rrit presionin ndaj Ukrainës
4 Maj 2012
Asnjë nga 27 Komisarët e BE nuk do të shkojë në Ukrainë për Kampionatin Evropian të Futbollit. Këtë e konfirmoi të enjten në mbrëmje një zëdhënës në Bruksel. Në këtë mënyrë Komisioni shton edhe më tej presionin ndaj qeverisë Janukoviç në Kiev. Që të hënën kryetari i Komisionit José Manuel Barroso, që është tifoz i madh futbolli, pati njoftuar përmes zëdhënëses së tij, se do t'i qëndrojë larg ngjarjes së madhe sportive.
"Ashtu si duken gjërat tani, presidenti nuk ka ndërmend të shkojë në Ukrainë për të marrë pjesë në ndonjë aktivitet në këtë kohë. Ne shpresojmë natyrisht, se do të shohim zhvillime në Ukrainë, që do ta kapërcejnë këtë situatë, që është me të vertetë shumë shumë serioze, që na shqetëson pa masë." - kështu u shpreh zëdhënësja e presidentit të komisionit, Pia Ahrenkilde, të hënën.
Barroso e shpjegoi këtë qëndrim të enjten në rrethin e komisionerëve të BE-së. Zëdhënësja e Komisionit u shpreh se në debatin, që pasoi, ishte bërë e qartë se të gjithë anëtarët e forumit kanë të njëjtin mendim, përsa i përket trajtimit të Julia Timoshenkos.
Jo vendim zyrtar por sinjal ndaj udhëheqjes ukrainase
Megjithatë Komisioni nuk mori asnjë vendim zyrtar. Me këtë tregohet mirëkuptim ndaj komisionerëve, të cilët vijnë nga vende, që janë të rezervuara ndaj një bojkoti politik të Kampionatit Evropian të Futbollit - si për shembull Polonia. Zëdhënësja nuk deshi të fliste për bojkot, por për një sinjal për udhëheqjen ukrainase. E para nga forumi 27 anëtarësh, që e anuloi pjesëmarrjen e saj në kampionatin Europian të Futbollit javën e kaluar, ishte zëvendëspresidentja Viviane Reding, përgjegjëse për çështjet e Drejtësisë dhe të Drejtat e Njeriut. Përmes një letre të hapur drejtuar presidentit te Federatës Evropiane të Futbollit, Mishel Platini, ajo e argumentoi këtë hap me gjendjen dramatike të ish-kryeministres së burgosur Timoshenko. Dhe Reding, e njohur për fjalët e saj të sinqerta, u bëri thirrje edhe politikanëve të tjerë të ndjekin shembullin e saj. Politikanët nuk duhet të tolerojnë shkeljen e të drejtave të njeriut.