Luftë hibride, spiunazh, terrorizëm: nga perspektiva e tre shërbimeve federale të inteligjencës, rreziqet për Gjermaninë janë më të mëdha se kurrë. "Kundërshtarët tanë, si Rusia, e interpretojnë tolerancën, moderimin dhe butësinë si dobësi", tha në Berlin Martin Jäger, kreu i Shërbimit Informativ Gjerman (BND) që nga shtatori.

Shkasi ishte dëgjimi publik i tre shërbimeve qendrore sekrete nga Komiteti i Kontrollit Parlamentar të Bundestagut (PKGr). Përveç Jäger-it, homologu i tij nga Zyra Federale për Mbrojtjen e Kushtetutës (BfV), Sinan Selen, dhe kreu i Shërbimit të Sigurisë Ushtarake (MAD), Martina Rosenberg, iu përgjigjën pyetjeve të Komisionit për tre orë.

Presidenti i BND: "Ne jemi tashmë në qendër të vëmendjes"

Të tre ishin të një mendimi për atë që përfaqëson kërcënimin më të madh për Gjermaninë dhe Evropën: Rusia. "Ne jemi tashmë në qendër të vëmendjes", tha shefi i BND-së Jäger, i cili më parë ka shërbyer si ambasador në Ukrainë. Në dy vjet e gjysmë, ai ka përjetuar më shumë se 1.000 alarme për sulme ajrore, deklaroi ish-diplomati. Gjithashtu me këtë përshtypje, ai theksoi detyrën që e konsideron veçanërisht të rëndësishme si president i shërbimit të fshehtë për botën e jashtme: ofrimin e informacionit për ushtrinë gjermane në lidhje me konfliktet e mundshme të armatosura.

Në ç'masë është Brigada e Ushtrisë Gjermane në Lituani në rrezik?

Presidentja e Kundërzbulimit Ushtarak (MAD) Martina Rosenberg është veçanërisht e preokupuar për sigurinë e Brigadës së Ushtrisë Gjermane në Lituani, e cila zyrtarisht ka nisur shërbimin në maj dhe pritet të jetë operacionale në vitin 2027. Situata e sigurisë në Detin Baltik, dhe me këtë në krahun lindor të NATO-s, është përkeqësuar më tej në muajt e fundit dhe mbetet e paqëndrueshme.

Shërbimet e fshehta parashikojnë përkeqësim të situatës

Presidenti i Shërbimit Informativ Gjerman (BN), Jäger, përmblodhi vlerësimin e situatës së kërcënimit për të treja shërbimet e fshehta gjermane: "Veprimet e Rusisë synojnë minimin e NATO-s, destabilizimin e demokracive evropiane dhe ndarjen dhe frikësimin e shoqërive tona." Ne duhet të përgatitemi për një përshkallëzim të mëtejshëm të situatës.

Për të qenë të përgatitur, tre shërbimet sekrete po kërkojnë kompetenca shtesë. Jäger kërkoi që ligji i BND-së të përshtatet me realitetet e kohërave të reja dhe bëri thirrje për më shumë hapësirë për manovrim në luftën kundër fuqive të huaja. Me këtë, ai nënkupton të njëjtën gjë si Seleni dhe Rosenbergu: aftësinë për të monitoruar më mirë armiqtë e mundshëm.

Sa kontroll është i nevojshëm?

Vetë forca dhe bashkëpunimi ndërkombëtar janë të varura nga njëra-tjetra, theksoi presidenti i Shërbimit Informativ Gjerman. Në të njëjtën kohë, ai la të kuptohej se agjencia e tij përfiton më shumë nga informacioni që merr nga shërbime e fshehta partnere jashtë vendit sesa anasjelltas. Në këtë kontekst, ai vlerësoi, nga njëra anë, kontrollin e Bundestagut, por në të njëjtën kohë kritikoi kostot e personelit që kjo sjell për agjencinë e tij. "Unë mbështes një organizatë më efikase", deklaroi Jäger, pa paraqitur ndonjë propozim konkret.

Kritikët e kontrollit të shërbimit të fshehtë janë veçanërisht kritikë ndaj përbërjes së Komisionit të Kontrollit, i cili, në teori, duhet të përfshijë nëntë anëtarë nga të gjitha grupet parlamentare. Megjithatë, në realitet janë vetëm gjashtë, sepse kandidatët e opozitës të Alternativës për Gjermaninë (AfD) dhe Partisë së Majtë nuk arritën të fitonin shumicën në zgjedhjet e Bundestagut.

Kryetari i Komisionit të Kontrollit Parlamentar, Marc Henrichmann, nga grup parlamentar CDU/CSU, nxori një përfundim tjetër nga seanca dëgjimore: "Nevoja e publikut gjerman për informacion është bërë shumë e qartë. Niveli i kërcënimit shumëplanësh, veçanërisht nga Rusia, por edhe nga aktorë të tjerë, është serioz."