Në prag të fillimit të manovrës së madhe vjetore detare mes SHBA-së dhe Koresë së Jugut Koreja e Veriut ashpërsoi sërish tonin dhe kërcënoi me masa hakmarrjeje. Komiteti koreanoverior për Bashkimin Paqësor të vendit i akuzoi të dyja vendet se me manovrën e tyre duan ta shkatërrojnë Korenë e Veriut.

Ministria e Jashtme e Koresë së Veriut kishte deklaruar më parë se "SHBA po e kërkon vetë luftën bërthamore" dhe se "me provokimet e tyre Koreja e Jugut dhe SHBA-ja do të shkaktojnë një valë hakmarrjeje dhe vetëshkatërrimin e tyre."

Sipas të dhënave zyrtare në manovrën pesëditore «Vigilant Ace» do të marrin pjesë më tepër se 230 avionë ushtarakë si dhe 12 000 ushtarë. Qëllimi i manovrës është që të forcojë gatishmërinë e të dy vendeve aleate.

Në manovrën e zhvilluar vitin e kaluar morën pjesë 16 000 ushtarë dhe më tepër se 200 avionë.

Manovra zhvillohet vetëm pak ditë pasi Koreja e Veriut ndërmori një test të ri me një raketë ndërkontinentale, që u kritikua ashpër prej bashkësisë ndërkombëtare. Pas kësaj prove bërthamore Koreja e Veriut deklaroi se tani mund të sulmojë të gjithë territorin e SHBA-së.