Kosova ka nevojë për EULEX-in
4 Shtator 2012![](https://static.dw.com/image/15368265_800.webp)
Presidentja e Kosovës Atifete Jahjaga, ka kërkuar nga shefja e diplomacisë evropiane, Catherine Ashton, që t'ia vazhdojë mandatin edhe per dy vjet deri në vitin 2014, misionit të BE-së në Kosovë, EULEX. Këtë kërkesë presidentja Jahjaga e bëri nëpërmjet një letre që i dërgoi baroneshës Ashton të hënën në Bruksel. Zyrtarë nga zyra e shefes së diplomacisë evropiane e konfirmojnë se ata e kanë marrë letrën, ndërsa, përgjigja e cila besohet se do të jetë pozitive do të kthehet në Prishtinë gjatë ditës së sotme e martë, 04.09.2012. Me këtë hap pritet të qartësohet përfundimisht mënyra e funksionimit të misionit evropian për sundimin e ligjit në kuadër të institucioneve kosovare. Në bazë të Kushtetutës, Kosova ka mundësi që të kalojë tek mekanizmat ndërkombëtarë përgjegjësi për çështje të caktuara.
Letërkëmbimi ndërmjet presidentes së Kosovës, Atifete Jahjaga dhe shefes së diplomacisë evropiane, Catherine Ashton, pritet të votohet në formën e një marrëveshje në parlamentin e Kosovës ditën e premte, kur edhe do të miratohen ndryshimet kushtetuese të cilat mundësojnë fundin e mbikqyrjes ndërkombëtare të pavarësisë.
Misioni i Bashkimit Evropian për polici dhe drejtësi, EULEX-it u vendos në Kosovë në vitin 2008 me ftesën e autoriteteve të Prishtinës. Ky mision ishte paraparë me planin e Marti Ahtisarit, në bazë të të cilit edhe është shpallur pavarësia e Kosovës.
Kosova ka nevojë ende për misionin e EULEX-it
Zëvëndës-kryeministri Hajredin Kuçi, thotë se Kosova ka nevojë edhe për pak kohë për misionin EULEX, por sipas tij prezenca e këtij misioni në Kosovë, nuk e zbehë fundin e mbikqyrjes së pavarësisë. “Ne kemi menduar se edhe dy vitet e ardhshme Kosova ka nevojë për veprime të tilla, poashtu është menduar edhe nga BE-ja që EULEX-i të jetë prezent, por jo një prezencë në një shtet që do të ketë mbikqyrje ndërkombëtare, por në një shtet sovran dhe të pavarur që ka nevojë me ngritjen e kapaciteteve në vendosjen e rendit dhe ligjit. Natyrisht bashkëpuni me BE-në do të vazhdojë në kuptimin me Komisionin Evropian dhe rrugëtimin tonë për në Bashkimin Evropian. Kjo nuk është ajo që e zbeh fundin e mbikqyrjes së pavarësisë, por është ajo që është menduar duke marrë parasysh gjendjen reale në Kosovë dhe atë që është perceptimi i BE-së për zhvillimet në Kosovë”, thotë Hajredin Kuçi.
Me përfundimin e mbikëqyrjes ndërkombëtare të pavarësisë së Kosovës e cila do të ndodhë më datën 10 shtator, misioni EULEX-i do të mbetet i vetmi institucion ndërkombëtar në Kosovë, i cili vazhdon të ketë fuqi ekzekutive në fushën e sundimit të ligjit.