Kuvendi i Kosovës miratoi në parim një nga ligjet me të rëndësishme që parashihet në pakon e statusit të ndërmjetësit Marti Ahtisari, ligjin për perdorimin simboleve të Kosovës, siç janë flamuri, stema dhe himni. Edhe pse statusi i Kosovës akoma nuk është zgjidhur deputetët e kuvendit miratimin e këtij ligji e cilësuan si një bazë ligjore për subjektivitetin ndërkombëtar të Kosovës dhe një sinjal, që vendi po bëhet gati siç thanë për ditën e parë të pavarësisë.

Ligji për përdorimin e simboleve të Kosovës pavarësisht miratimit në parlament, duhet të kalojë edhe në një shqyrtim tjetër, në zyrën ligjore të administratës ndërkombëtare e cila përfundimisht e bën atë të zbatueshëm në Kosovë. Ky shqyrtim merr pak kohë, por deputët u shprehen të bindur se ligji nuk do të kontestohet nga zyra ligjore e UNMIK-ut, për faktin që ai është hartuar krejtësisht sipas rekomandimeve të pakos së Marti Ahtisarit.

Është interesante të theksohet se Kosova qysh tash mund të thuhet se ka ligjin për përdorimin e simboleve mirëpo, nuk ka akoma simbolet e saj, që do ta identifikonin në arenën ndërkombëtare. Një komision parlamentar tashmë është formuar për të përzgjedhur flamurin, himnin dhe stemën, mirëpo kjo thuhet se nuk do të ndodhë deri në zgjidhjen e statusit të Kosovës. Sidoqoftë, autoritet kosovare kanë shtruar para vetës një detyrë, që të hartojnë dhe miratojnë deri në fund të këtij viti, shumë pika që parashihen në pakon e ndërmjetësit Marti Ahtisari, të bindur se poashtu fundi i vitit do të shënojë edhe vendimin për të ardhmen e Kosovës. Po diskutohet edhe projektligji për Ministrinë e Punëve të Jashtme e Shërbimin Diplomatik si dhe për praninë ushtarake ndërkombëtare në Kosovë. Ndërsa, sa i përket pranisë civile ndërkombëtare, autoritet e Kosovës janë shprehur, se janë të favor të një pranie të lehtë civile ndërkombëtare pas zgjidhjes së statusit, mirëpo që ajo të jetë sa më afatashkurtër.