Markus Löning, i ngarkuari i qeverisë gjermane për të drejtat e njeriut, thotë, se u prit në mënyrë profesionale në ministrinë e jashtme në Minsk, por për fatin e të burgosurve politikë nuk arriti të mësojë gjë.

"Ka një bllokadë komunikimi. Nuk dimë kurrgjë për gjendjen e të burgosurve. Kontakti i fundit me avokatët ka qenë më 29 dhjetor. Avokatëve u është ndaluar të flasin, ata s'lejohen t'u thotë gjë të afërmve dhe botës përreth, pra një situatë shumë e keqe."

Të afërmit janë gjithë frikë, thotë Löning. Ata nuk dinë, nëse të burgosurit, disa prej të cilëve janë rrahur gjatë arrestimit, kanë marrë ndihmë mjekësore, shton ai. Këtë si dhe vizitat e të afërmve i garanton kushtetuta bjelloruse. Megjithatë, as ata as i ngarkuari i qeverisë gjermane për të drejtat e njeriut nuk lejohen të takohen me ta në burg. "Pastaj thashë: do të doja të vizitoja të burgosurit. Edhe aty mu tha: Po atëherë po ua përcjellim këtë zyrave kompetente. Përgjigje nuk mora, as negative, as pozitive, thjesht asgjë."

Për këtë Löning duket i zemëruar. Kësaj i shtohet akuza absurde, se shërbimet e fshehta të Gjermanisë dhe Polonisë janë përfshirë në protestat kundër zgjedhjeve të diskutueshme presidenciale. Ky ishte pretendimi i një gazete bjelloruse, besnike e qeverisë.

Ministria e jashtme gjermane ka reaguar me zemërim dhe ka thirrur për një bisedë ambasadorin bjellorus. Edhe organizatori i Konferencës së njohur të Sigurisë në Mynih, Wolfgang Ischinger, nxjerr konsekuenca nga zhvillimet në Bjellorusi dhe ka vendosur të përjashtojë prej saj ministrin e jashtëm bjellorus, të ftuar para disa javësh, para zgjedhjeve në atë vend.

Löning bën thirrje për sanksione nga BE-ja kundër qeverisë bjelloruse, për shembull me ndalimin e hyrjes në vende të huaja. Ai thotë, se Bjellorusisë i duhen zgjedhje të lira dhe një president tjetër.

Autor: Nina Werkhäuser/ Elert Ajazaj

Redaktoi: Aida Cama