Kriza bankare prek Gjermaninë
29 Shtator 2008![](https://static.dw.com/image/3273065_800.webp)
35 miliardë euro garanci i ka premtuar shteti gjerman konsorciumit bankar që shpëtoi nga falimentimi koncernin e kredive hipotekare 'Hypo Real Estate'. "Qeveria gjermane mbron kështu të gjithë pjesëtarët e tjerë të tregut financiar që do të kërcënoheshin në se shteti nuk do të ndërhynte", tha zëdhënësi i qeverisë Ulrih Vilhelm (Ulrich Wilhelm) .
Eksperti i ekonomisë bankare Tomas Hartman-Vendel (Thomas Hartmann-Wendel) thotë se kjo ndihmë ruan besiminin aq të nevojshëm për ekzistencën e sistemit bankar. 'Kjo kredi krijon besim në sektorin bankar. Ajo është shumë e rëndësishme në mënyrë që kriza bankare të mos thellohet më tej siç e pamë javët e mëparshme", - tha profesori nga Këlni për një televizion gjerman.
Rekord i uljes së vlerës së aksioneve
Por besimi nuk arriti të krijohej aq shpejt në bursën e Frankfurtit. Aksioni për shpëtimin e 'Hypo Real Estate' nuk i solli asnjë përfitim të hënën në mëngjes koncernit që i kishte fshehur vazhdimisht problemet. Për këtë thyerje besimi aksionet e tij u dënuan si kurrë më parë në historinë e DAX-it me një rënie të vlerës me 75,5 përqind në 3,30 euro.
Lajmi për gati falimentimin e institutit nga Mynihu i goditi edhe aksionet e instituteve të tjera financiare të DAX-it. Më së shumti pësuan aksionet e Commerzbank-ut, kursi i të cilave ra me një të katërtën e vlerës, ndërsa ato të "Deutsche Bank" dhe "Allianz" me nga gjashtë për qind.
Ishte hera e parë në historinë e Gjermanisë kur një ndërmarrje e DAX-it ishte në rrezik falimentimi. Ekspertët parashikojnë që ky nuk do të jetë rasti i fundit. Hartman-Vendel thotë se mësimi për të ardhmen është që nuk duhet të besojmë se sektori privat është gjithmonë më i miri. "Ne kemi nevojë për menaxhim më të mirë, kontroll më të mirë dhe mbikqyrje më të mirë edhe në sektorin privat", thotë ai.
Ri-shtetëzim, një opsion ky që ende nuk ka hyrë në rend të ditës, por që sipas shumë ekspertëve, në se kriza financiare merr përmasa edhe më të gjëra, atëherë shteti do të duhet të ri-shtetëzojë institutet e prekura me argumentin e dështimit të ekonomisë së tregut.