Qeveria franceze është përballur furishëm me lajme të këqia. Në fillim të nëntorit Fondi Monetar Ndërkombëtar (FMN) njoftoi në raportin financiar se kapaciteti i dobët konkurues i industrisë franceze është në shkallë ndërkombëtare. Borxhet masive të Francës mund të bëhen kërcënim për stabilitetin në eurozonë, nëse besimi i investitorëve vazhdon të bjerë, tha FMN, duke paralajmëruar "mundësinë për infektim," pasi bankat franceze janë të përfshira ngushtë me vendet e jugut në Eurozonë.

"Bashkimi Evropian është shqetësuar gjithashtu. Duke parashikuar rritjen ekonomike në eurozonë për vitin 2013, komisioneri për çështje monetare Olli Rehn ka theksuar se Gjermania është në formë shumë më të mirë krahasuar me Francën. Përderisa Komisioni pret, që në Francë të ketë rritje ekonomike për 0.4 përqind, qeveria franceze parashikon dyfishin e saj me 0.8 përqind. Parashikimi tregon për 3.5 përqind borxhe të Francës në lëvizjen ekonomike vitin e ardhshëm, në vend të 3.0 përqind të parashikuara nga qeveria franceze.


Situata është shumë serioze, sepse lëvizja e ngadaltë e ekonomisë franceze nuk është dukuri e përkohshme, është e bazuar në probleme strukturore brenda ekonomisë franceze", thotë Henrik Uterwedde nga Instituti Gjermano-Francez në Ludwigsburg. Ai thotë për Deutsche Welle-n se presidenti francez, Francois Hollande, duhet të ulë borxhin shtetëror dhe se politika më të ashpra mund ta ringjallnin ekonominë. Hollande përballet me dilema, thotë Uterwedde.

Financat mbarojnë

Në raportin e komisionit qeveritar të prezantuar javën e kaluar industrialistët francezë dhe ish kreu i gjigandit hapësinor, EADS, Louis Gallois, rekomanduan 22 masa, që do të përforconin konkurencën në industrinë franceze. Vetëm një "shok" i vërtetë do të mund të kthente industrinë në rrugën e duhur, tha Gallois, pasi kishte biseduar me kryeministrin, Jean-Marc Ayrault, në Paris. "Populli francez duhet të mbështesë këtë përpjekje të përbashkët, që do mund të bëhej një projekt i shkëlqyeshëm për vendin tonë", tha ai. Do të duheshin debate dhe dialogë në kompani, në nivelin rajonal dhe kombëtar, për të aktivizuar dinamika dhe stimuj të rinj."

Në përgjigje Ayrault njoftoi se do të ketë ulje të taksave për biznese deri në shumën 20 miliardë euro (25.4 miliardë dollarë) gjatë tri viteve të ardhshme.

Çka me të vërtetë i duhet shtetit, janë reformat më radikale në sektorët ekonomikë dhe administrativë, tha Uterwedde: Hollande nuk ka guxuar të trajtojë reformat strukturore, por gjithësesi do të duhet ta bëjë.

Uterwedde thekson se raporti i fundit më alarmues nga Këshilli gjerman i Ekspertëve të Ekonomisë për konkurencën e bizneseve në Francë pohon se pa një "goditje konkuruese" ekonomia nuk do të jetë në gjendje të rimëkëmbet. Ditorja franceze Le Figaro fton socialistin Hollande të "bëhet Schrëder!" duke iu referuar kancelarit gjerman Gerhard Schrëder, i cili e shtyu përpara agjendën 2010 për tregun e punës dhe reformat sociale, edhe pse kishte kundërshtime të shumta.

Kryeministri francez Jean-Marc Ayrault takohet me kancelaren Merkel në Berlin të enjten (15.11. 2012) për të koordinuar politikat ekonomike.
Thuhet se qeveria franceze është e shqetësuar nga "nxitja e panikut" në Gjermani për shkak të ekonomisë franceze. Sipas gazetës Liberation qeveria e ndjen se kjo do të mund të krijonte jostabilitet në treg. Por Uterwedde nuk sheh shumë mosmarrëveshje në mes dy shteteve. "Fati i tyre është që të punojnë së bashku, sepse dy shtetet janë të lidhura ngushtë dhe udhëheqin rrugën në eurozonë", tha Uterwedde. "Ne nuk do të mund të tejkalojmë krizën në eurozonë pa bashkëpunimin e këtyre dy shteteve."

Franca duhet të reagojë

Franca ka vullnet për të nisur reformat, thotë komisioneri Rehn. Dhe ai thekson se politikat konkrete ende mund të ndryshojnë parashikimin e Komisionit Evropian për rritje ekonomike në vitin 2013. "Për momentin ne jemi duke përjetuar një ndryshim të rëndësishëm në politikat franceze, sa i përket konsolidimit të buxhetit dhe konkurencës", u tha Rehn reporterëve në Bruksel. Ai tha se nuk është fare situatë statike, por do të ndryshojë. Uterwedde gjithashtu e sheh Presidentin Hollande në prag të një ndryshimi të nevojshëm. Hollande e di se duhet të ulë borxhin kombëtar, por ai ende ku ka menduar, se si do ta bëjë atë. Uterwedde konkludoi: "Debatet politike në Francë do të jenë të vështira."

Sipas parashikimit të Komisionit të BE-së borxhi i sektorit publik në Francë do të rritet më shumë se 90 përqind të produktit të brendshëm bruto (GDP) vitin e ardhshëm, prag kritik për qëndrueshmërinë afatgjate të borxhit.