7 mijë trupa shtesë nga NATO-ja në Afganistan

SHBA pas vendimit për dërgimin e 30 000 ushtarëve shtesë në Afganistan janë të kënaqur me reagimet e partnerëve të saj në NATO: "Përgjigja ishte pozitive", tha ministrja e Jashtme e SHBA-së, Hillary Klinton në Bruksel. Sipas Sekretarit të Përgjithshëm të NATO-s Anders Fogh Rasmussen, SHBA ka siguruar nga aleatët premtimin për së paku 7000 ushtarë shtesë. Këtë ai e bëri të ditur pas konsultimeve me partnerët në trupën ndërkombëtare të NATO-s ISAF. 25 prej 44 shteteve përbërëse të trupës së mbrojtjes ISAF, kanë bërë të ditur se do të forcojnë prezencën e tyre ushtarake në Afganistan vitin e ardhshëm. Momentalisht ISAF-i ka gjithsej 83.500 ushtarë, 44 600 prej tyre nga SHBA. Përveç kësaj priten edhe kontribute të mëtejshme të aleatëve, tha Rasmussen-i.

Shtim i angazhimit civil gjerman në Afganistan?

Pas gatishmërisë së shteteve të tjera për të vënë në dispozicion më shumë se 5000 ushtarë, Gjermania e ndjen vetën nën presion për të vepruar. Ministri i Jashtëm gjerman, Guido Westerwelle përsëriti ofertën e Gjermanisë për të shtuar angazhimin civil në Afganistan. Fillimisht duhet të zhvillojmë një debat strategjik për synimet e misionit tonë, tha Westerwelle. Në Berlin thuhet se duhet të presim konferencën për Afganistanin në fund të janarit në Londër, të flasim me aleatët dhe të shohim, se si do të shkojë krijimi i qeverisë në Kabul pas zgjedhjeve të kontestueshme.

„Në rradhë të parë është fjala për synimet, për strategjinë dhe pastaj për instrumentet, se me çfarë strategjie do t'i arrijmë këto synime. Një diskutim në vendin, për çështjen se sa ushtarë do të dërgohen, apo duhet të dërgohen, një diskutim të tillë ne e refuzojmë," u shpreh Westerwelle.

Autor: Angjelina Verbica/dpa

Redaktoi: Auron Dodi