Në procesin gjyqësor kundër ish-drejtorit të Fondit Monetar Ndërkombëtar (FMN) Dominique Strauss-Kahn akuzuesja me sa duket e humbi plotësisht besimin e prokurorisë. Të hënën 32 vjeçarja nga Guinea, sanitare në një hotel të Nju Jorkut e cila e akuzoi Domique Strauss-Kahnin për tentativë përdhunimi u ftua në një bisedë në prokurori. 

Avokati i sanitares: Injorohen provat

Avokati i sanitares pas daljes nga prokuroria u tregua i zhgënjyer. Prokurori Cyrus Vance i ka mohuar klientes së tij drejtësi në një rast përdhunimi. Kështu u shpreh avokati mbrojtës Kenneth Thompson: "Ai jo vetëm injoroi një viktimë të pafajshme, por ai injoroi edhe provat e qarta forensike, mjekësore dhe fizike të këtij rasti."

Dominique Strauss-Kahn vërtet nuk ndodhet më nën akuzë dhe miqtë e partisë së Strauss-Kahnit i edhe familja e tij tani janë të gëzuar. Por figura e tij ende nuk është e rehabilituar, megjithëse në Francë ndodh jo rrallë që politikanët që kanë pasur probleme me drejtësinë ia dalin prapë të ngrihen në këmbë.

Pse Dominique Strauss-Kahn ende nuk mund të flejë i qetë

E  rëndësishme për momentin është se çfarë drejtimi do të marrë opinioni publik në Francë, pro apo kundra Strauss-Kahnit. Sepse janë edhe dy procese të tjera që e kërcënojnë atë dhe që mund të dëmtojnë përfundimisht imazhin e të dëshiruarit për kandidat të socialistëve francezë në zgjedhjet presidenciale. Në aferën me sanitaren është ende në fuqi një proces civil, dhe po qe se ai shkon në dëm të Strauss-Kahnit, mund të rindizet  sërish akuza për përdhunim në hotel. Socialisti mund të dënohet me një gjobë, gjë që në SHBA nuk është e vështirë të ndodhë.

Nga ana tjetër shumë francezë e ndjekin me shumë interes rastin e shkrimtares franceze Tristane Banon. Ajo ka guxuar pas vitesh të ngrejë një padi kundër Dominique Strauss-Kahnit për tentativë përdhunimi. Avokati i Banon thotë për revistën franceze "20 minuta" se "afera e Strauss-Kahnit sapo ka filluar".

Ka shumë gjasa që procesi për shkak të mungesës së provave të mos zhvillohet, apo që gjykatësit ta kategorizojnë atë si ngacmim seksual dhe jo tentativë për përdhunim, e socialisti nuk ka pse të ketë më frikë nga drejtësia franceze.

Humbja e prestigjit

Por a do ta shohë opinioni francez këtë si një delikt kavalierësh? Një kalimtar francez i cili e sheh të drejtë ndalimin e procesit gjyqësor në Nju Jork dyshon: "Mendoj se vendimi është i drejtë, sepse thjesht nuk ka prova. Tani duhet parë nëse ka akuza të tjera të këtij lloji. Sepse nëse ai është vërtet i pafajshëm këtë nuk e di."

Sidoqoftë Strauss-Kahn tanimë do ta ketë shumë të vështirë të rigjejë po atë prestigj, siç e gëzonte më parë. Socialistët e tij që tani janë të ndarë në dy kampe përsa i përket çështjes Strauss-Kahn. Pro dhe kundër tij. Shkurt karriera politike e tij ende nuk ka shanse.

 

Autor: AG/Lindita Arapi

Redaktoi: Mimoza Kelmendi