Merkel hap panairin e CeBIT në Hanover
14 Mars 2007![](https://static.dw.com/image/2385055_800.webp)
Kancelarja Angela Merkel në hapje të panairit CeBIT u shpreh për forcimin e novacioneve dhe studimeve shkencore në Gjermani. Kancelarja theksoi, se teknologjia e informacionit luan një rol kyç në ekonominë gjermane. "Ne kemi nevojë për një ofensivë novacionesh, një klimë, në të cilën idetë të kthehen në vepra dhe rezultatet e studimeve në produkte të afta për tregun", tha kancelarja në Hanover:
"Çfarë mund të bëjë qeveria në një fushë të tillë, si mund të mbështesim dhe të motivojmë ne? Ne kemi "programin shoqëria e informacionit 2010" - kjo është një paketë strategjike ambicioze aksioni për të gjithë tregun e teknologjisë së informacionit dhe komunikacionit. Në dhjetor ne kemi organizuar për herë të parë në Pocdam samitin e teknologjisë së informacionit, duke treguar kështu përgjegjësinë për të tilla degë të novacioneve dhe të zhvillimit." Në fund të vitit do të zhvillohet samiti i dytë i teknologjisë së informacionit, premtoi Merkel, duke vënë në dukje planet për investimet me rreth 1,2 miliardë euro në këtë fushë deri në vitin 2009.
Vendi partner i panairit të sivjetëm është për herë të parë Rusia. Zëvendëskryeministri rus, Sergej Naryshkin, tërhoqi vëmendjen për faktin, se deri më sot dy të tretat e eksporteve ruse mbulohen nga lëndët e para. Por në plan afatgjatë nuk mund të kënaqemi me atë që buxheti i shtetit të jetë në varësi të çmimeve të tregut botëror për naftën dhe gazin. Ndaj ekonomia ruse dhe qeveria në mënyrë të qëllimshme janë duke i kushtuar vëmendje zhvillimit të degës së teknologjisë së lartë: "Mbi 150 ndërmarrje të ekonomisë private dhe shtetërore, institucione kërkimore-shkencore dhe arsimore si dhe parqe të teknologjisë duhet të karakterizojnë të tashmen dhe të ardhmen dhe të përçojnë përfytyrimin rus mbi tregun e teknologjisë së informacionit. Ne shpresojmë, që kontaktet tona në Hanover do të krijojnë mundësinë për t´i pasqyruar arritjet ruse në këtë drejtim dhe konsolidimin e tyre në kontakte afatgjata." Për kontakte të reja afatgjata shpresojnë edhe mëse 6.000 firma nga 77 vende të botës të prezantuara në panair.