Frank Zappa ka 22 vjet që ka vdekur. Por tani u publikua albumi më i fundit, "Dance me this", rezultat i një regjistrimi në studio, me eksperimente në synclavier dhe me këngë mongole të kënduara me zë fyti. Për fansat diçka e rrallë, në listat e hitparadës disku me siguri nuk do të zërë vend. Në raste të tjera, back-katalogu i artistëve që nuk jetojnë më mund të jetë një minierë e vërtetë ari.

Ai prehet në paqe që prej vitit 2009, por zëri i tij është më se i gjallë: më 2014 doli në qarkullim "Xscape"; pas albumit "Michael", ky ishte i dyti album i botuar pas vdekjes i King of Pop. Producenti i famshëm Timbaland përgatiti në pult tetë tituj të papublikuar, duke u shtuar zëra të shquar për duet si Mary J. Blige apo D'Angelo. "Xscape" nuk do të jetë albumi i fundit i "Jacko"-s së vdekur.

Elvis Presley thyen çdo rekord: deri kur vdiq, më 1977 ai publikoi 600 milionë albume, ndërkohë janë publikuar më shumë se dy miliardë disqe dhe kaseta. Shtëpia e tij e fundit në Graceland ka kohë që është kthyer në qendër pelegrinazhi për fansa nga mbarë bota. Kur në përvjetorin e 25-të të vdekjes doli në qarkullim kompakt-disku "Elvis 30 #1 Hits", në më shumë se 17 vende ai kryesoi hitparadën.

Paco de Lucia mbahej si mjeshtri i madh i kitarës për Flamencon. Ai i vuri emrin e tij këtij zhanri në shekullin e 20-të. Kur spanjolli vdiq 66 vjeç në shkurt 2014, ai ende kishte shumë plane: mes të tjerash ai punonte për albumin e tij të parë që prej dhjetë vjetësh, të cilin ia kishte kushtuar këngëve popullore Copla të atdheut të tij. "Cancion Andaluza" doli në treg në fund të prillit 2014.

Kur më 1983 u publikua albumi i Bob Marley "Confrontation", muzikanti më i famshëm i Reggae në botë kishte dy vjet që kishte vdekur. Gruaja e tij Rita pati kaluar nëpër duar materialet e papublikuara, që i publikoi së bashku me bandën e Marley "The Wailers". "Buffalo Soldier", një monument muzikor për ushtarët afro-amerikanë të SHBA në luftën civile u bë një nga hitet më të famshme të xhamaikanit.

Janis Joplin vdiq në tetor '70 nga një mbidozë heroine duke hyrë në "Club 27" të heronjve të muzikës që vdiqën të rinj. Ajo ndodhej në kulmin e punës për regjistrimin e albumit të saj të ri. Grupi i saj muzikor megjithatë e nxorri në treg "Pearl". Ky disk u kthye në suksesin më të madh të saj. Kënga e vetme e papërfunduar, kur u botua tingëlloi si ogur i keq: "Varrosur e gjallë në muzikën blues".

"Falemnderit Gilbert, publiku nuk do të të harrojë kurrë", shkruhet në gurin e varrit të Gilbert Becaud. Fansat vazhdojnë të vizitojnë varrin e tij në varrezën e Parisit, Pere Lachaise, për të nderuar njërin nga yjet e famshëm të këngës franceze. Në përvjetorin e 10-të të vdekjes së tij, në vitin 2011, e veja e tij nxorri në qarkullim kompakt-diskun "I pavdekshëm - këngët e tij më të famshme".

"Man in Black" doli në treg 11 vjet pas vdekjes së tij. "Out Among the Stars" doli në qarkullim në mars 2014, por këngët Johnny Cash i kishte hedhur në letër 30 vjet më parë. Pra në ato vite 1980, kur skena e muzikës Country e humbi interesin për të dhe firma që i publikonte disqet u nda prej tij. I biri, John Carter Cash tha se ka ende shumë material të pabotuar, për pesë albume të tjera.

Pianisti i SHBA dhe këngëtari Nat King Cole ka vdekur që në vitin 1965, por e bija e ringjalli atë në vitin 1991. "Unforgettable" quhej dueti i kombinuar më vonë, të cilin ajo e këndoi me të atin e vdekur. Albumi ku bënte pjesë kjo këngë "Unforgettable … with Love" me këngë të njohura të atit të saj, u shit 14 milionë herë dhe korri shtatë çmime Grammy.

Pas vdekjes së saj më 2011, kërkesat për albumet e Amy Winehouse ishin shumë të mëdha. Megjithë eksceset e drogës, këngëtarja e muzikës soul ishte mjaft produktive në karrierën e saj të shkurtër dhe la të papublikuara mjaft këngë për një kompakt-disk tjetër. "Lioness: Hidden Treasures" zuri menjëherë vendet e para në hitparadën britanike.

Pasi britaniku Marc Bolan e humbi jetën në vitin 1977 si pasagjer në një automjet Mini Cooper, publikimet me muzikën e shpikësit të Glam-Rock-ut kanë qenë biznes fitimprurës. Në vitin 1981 u publikua albumi "You Scare Me To Death", me këngë që këngëtari i Grupit T-Rex i kishte shkruar që në vitin 1966.

Kur ish-bitëllsin John Lennon e vranë në vitin 1980, bota kaloi në shok. Vejushës së tij Yoko Ono iu deshën tri vjet për ta vazhduar punën në albumin, për të cilin patën punuar bashkë: "Qumësht dhe mjaltë" ishte pasardhës i "Double Fantasy". Albumi përmban këngë të të dyve, por në një kohë kur Yoko nxorri në këngë gjithë hidhërimin e saj, këngët e tij tingëllonin ende të pambaruara.

Elvis është i vetmi muzikant, që ka kryesuar ndonjëherë hitparade në katër dekada të ndryshme. Sipas "SoundExchange" ai është artisti veprat e të cilit në formë digjitale janë klikuar më shpesh në 10 vitet e fundit. Posthum ai është regjistruar në shumë skena hall of fame në SHBA. Shtatë vjet pas vdekjes Presley kishte një gjysmë miliard disqe të shitura në mbarë botën.

Elvis Presley ndërroi jetë më 16 gusht 1977 në rezidencën e tij me famë Graceland. Që nga viti 1982 ajo u kthye në Graceland Museum - e qysh atëherë me një gjysmë milioni vizitorë në vit ajo është rezidenca më e vizituar në SHBA pas shtëpisë së bardhë në Uashington.

Në vitin 1965 për herë të parë dhe të vetmen Beatles takuan Elvis Presley - ashtu si për shumë muzikantë të tjerë ai ishte një idhull për Fab Four. E kë kishte idhull Elvis? Ai e himnizonte këngëtaren Gospel Sister Rosetta Tharpe, njihte muzikën e këngëtarit Country Hank Snow dhe e cilësonte "gjenial" James Dean.

Edhe të tjerë muzikantë janë frymëzuar nga Presley. "Bye Bye Birdie" bazohet tek ngjitja e Elvis, në 1977 në teatrin Astoria në Londër u shfaq premiera e "Jukebox Musical" dhe në 2005 nisi "All Shook Up" në Broadway. Që nga viti 2013 është në turne "The Million Dollar Quartet" - sipas një shfaqjeje legjendare të improvizuar në 1956 me Elvis Presley, Johnny Cash, Jerry Lee Lewis dhe Carl Perkins.

Grenada në vitin 1978 i kushtoi një pullë Elvis Presley-t. Në 1988 pasoi Gjermania, në 1993 SHBA, ku asokohe 1.2 milionë amerikanë votuan për këtë pullë - dhe shumica zgjodhi atë me imazhin e Elvisit të ri. Pulla e veçantë me vlerën 29 cent është ndër më të shiturat e të gjitha kohërave me 500 milionë ekzemplarë.

Një Elvis në bronz u është dhënë si çmim nga viti 1989 deri në 1991 fituesve të konkursit ndërkombëtar International Rock Award. Award në dallim nga Grammy synonte vlerësimin e muzikantëve të Rock-ut, por ai u dha vetëm për dy vjet. Për këtë arsye Elvis në bronz tani ndodhet në vitrina krahas legjendave të Rock-ut si Eric Clapton, Keith Richards, Ozzy Osbourne, Alice Cooper dhe Lou Reed.

Statuja e famshme e Belgjikës me djaloshin e vogël "Manneken Pis", një atraksion i Brukselit, ka madje një kostum të vetin si Elvis. Statuja herë pas here vishet me kostume të reja: në gusht 1999 atë e veshën si King of Rock'n'Roll.

Në dhjetor 2011 tre koleksionistë gjermanë hapën një muze të Elvisit në Dyseldorf. Në ekspozitën me figura prej qiriri prezantohen rregullisht 600 nga 1.500 eksponatet që ekzsitojnë gjithsej. Muzeu bën reklamë në faqen e internetit, se "Elvis Presley paraqitet shumë i afërt, e po ashtu edhe familja e tij, besimi i tij, humori i tij dhe kompetenca e tij."

Në nëntor 2013 16 vjeçari David Thibault fitoi në Kibek një konkurs imituesish. Një televizion lokal e postoi versionin e tij të "Blue Christmas" në Youtube - dhe me 7,4 milionë klikime vetëm brenda dhjetë ditësh ai u përhap në mbarë botën.

Legjenda jeton: zartyrisht ka klube të tifozëve të Elvis Presley-t në 38 vende. Që nga 2007 BBC organizon spektaklin "World's Greatest Elvis": Shawn Klush nga Pensilvania është një prej fituesve. Graceland ka konkursin e vet "Ultimate Elvis Tribute Artist Contest" e po ashtu edhe në qytetin Bad Nauheim në landin e Hesenit në Gjermani që nga viti 2002 organizohet "European Elvis Festival".

Suveniret Elvis shiten shumë. Qofshin ato bizhuteri moderne, shalle apo etiketa: "Elvis Presley Enterprises" menaxhon jo vetëm Graceland, por firma është përgjegjëse edhe për posedimin e markës. Rregullisht the King ndodhet në krye të listës së të vdekurve që fitojnë më shumë, ka hulumtuar revista ekonomike në SHBA Forbes – duke u renditur pranë Michael Jackson dhe Elizabeth Taylor.