Ministri i jashtëm i Spanjës dhe kryesuesi i radhës së Organizatës për Siguri dhe Bashkëpunim Evropian, Miguel Angel Moratinos, deklaroi në Prishtinë se, çfarëdo lloji i dhunës i shfaqur në Kosovë do ta dëmtojë procesin e zgjidhjes së statusit të saj. Moratinos tha se zgjidhja Kosovën duhet të arrihet përmes dialogut ndërmjet të dyja palëve shqiptarëve dhe serbëve dhe shprehu mbështetjen e vendit të tij dhe të OSBE-së, për misionin e kryendërmjetësit ndërkombëtar për statusin e Kosovës, Marti Ahtisaari.

"E kam shprehur para autoriteteve, se OSBE-ja ka karakter neutral dhe nuk merr pjesë në bisedimet e Vjenës. Mirëpo, kjo nuk do të thotë se ne nuk e mbështesim të dërguarin e posaçëm të OKB-së, Marti Ahtisari, për të gjetur një zgjidhje përfundimtare", tha ministri i jashtëm i Spanjës, Miguel Angel Moratinos. Ai tha se, vendi i tij dhe OSBE-ja mbështesin perspektivën evropiane për Kosovën dhe rajonin.

"Si ministër i jashtëm i Spanjës dhe si ministër i një vendi që është anëtar i Bashkimit Evropian, i kam garantuar autoritetet e Kosovës se ne mbështesim gjithë Ballkanin që të bëhet pjesë e BE-së sa më shpejt", tha shefi i diplomacisë spanjolle, Moratinos. Sipas tij, është shumë i rëndësishëm unifikimi i qëndrimeve të vendeve të Bashkimit Evropian, sepse kjo do të çojë në zgjidhjen më të shpejtë të proceseve. Presidenti i Kosovës, Fatmir Sejdiu, nga ana e tij, çmoi përkrahjen dhe ndihmën e OSBE-së dhe të Spanjës për Kosovën, ndërsa u angazhua, për përshpejtimin e zgjidhjes së statusit përfundimtar të Kosovës.

Kryesuesi i radhës së OSBE-së, Miguel Angel Moratinos, i cili vizitoi Beogradin dhe Prishtinën, tha se misioni i OSBE-së në Kosovë do të vazhdojë të ndihmojë administratën ndërkombëtare si dhe institucionet qendrore e ato lokale. Misioni i OSBE-së në Kosovë është më i madhi në rajon me mbi një mijë punëtorë dhe zyrtarë të angazhuar. Në këtë linjë kryesuesi i OSBE-së, tha se kjo organizatë do të luajë një rol shumë të rëndësishëm në implementimin e marrëveshjes së statusit të Kosovës.