Ata janë ulur në një kishë të dikurshme të rrethuar nga shumë instrumente nga e gjithë bota. Po aq i pazakontë sa auditori është edhe dega e studimeve që kanë filluar këtë semestër këta 24 studentë të Universitetit të Hildesheimit. Në gjithë Gjermaninë kjo është një degë unike. Fjala është për studimin me kohë të pjesshme në kuadër të programit pilot "musik.welt". Brenda dy vjetësh studentët mund të mësojnë se si mund të kontribuojë muzika për integrimin në shkolla, kopshte dhe projekte sociale.

Gjysma e studentëve të moshës 20 deri në 60 vjet, ka një sfond emigrimi. Ata vijnë nga Maroku, Irani, Taxhikistani apo Turqia. Si p.sh. 50-vjeçari Yusuf Sengër, që punon si instruktor në një shkollë për nxënës me vështirësi për përvetësimin e mësimeve. Si adoleshent ai  punonte në vendlindjen e tij në një fushë pambuku, për të blerë me paratë e fituara një saze. Tani, kaq vite më vonë, ai po përmbush ëndrrën e jetës.

Kush këndon, nuk ka kohë për budallallëqe

Sengëri e ka mësuar sazen me veshit. "Këtu nuk ka rëndësi që nuk kam kualifikim akademik", thotë sazexhiu, i cili tani është duke mësuar edhe kitarën. Për t'u regjistruar në këtë degë studimesh nuk është kusht të kesh maturë apo të kesh mbaruar ndonjë shkollë të lartë për muzikë. Megjithatë aplikantëve iu desh t'i nënshtroheshin një procesi përzgjedhës, ku theks i veçantë i vihej motivimit dhe aftësive të tyre muzikore. 

Jusuf Sengër përdor për shembull në klasën multikulturore ku jep mësim muzikën si një element lidhës. "Kush këndon, nuk ka kohë për të bërë budallallëqe," - thotë ai. Në klasë ai këndon me nxënësit e vet këngë për fëmijë nga pjesë të ndryshme të botës. Gjatë studimeve që po kryen tani ai dëshiron të marrë ide për të zhvilluar edhe më shumë projekte muzikore me ndihmën e të cilave mund të stimulohen proceset integrative.

Të gjitha kulturat muzikore janë të barabarta

Kursi drejtohet nga profesor Raimund Vogels. Ai është muzikolog dhe etnomuzikolog dhe drejton gjithashtu "Qendrën për Muzikën Botërore" të Universitetit të Hildesheimit. Në këtë qendër ka më shumë se 3500 instrumente muzikore, regjistrime dhe  libra nga e gjithë bota. Ky koleksion i përket Fondacionit të Saksonisë së Ulët dhe i është vënë qendrës në dispozicion si një hua e përhershme.

Vogels ka studiuar muzikë në Gjermani dhe Afrikë. 56-vjeçari ka punuar për dhjetë vjet si etnomuzikolog në Universitetin e Hanoverit, ku i lindi ideja për programin e ri. "Unë konstatova se studentët  nuk mund të fillojë shumë me faktin se kulturat muzikore të botës në një farë mënyre janë të barabarta dhe kanë cilësitë e tyre  të veçanta kulturore dhe estetike" - thotë ai.

Lënda mësimore është ndarë në module. Mësimi zhvillohet shpesh në fundjavë. Këto module përfshijnë fusha të tilla si etnologjia e muzikës, edukimi muzikor ndërkulturor dhe menaxhim projektesh. Në seminare, pjesëmarrësit mësojnë rëndësinë e muzikës në kultura të ndryshme dhe duhet të klasifikojnë instrumente nga pjesë të ndryshme të botës duke u bazuar në tingullin e tyre. Po ashtu ka edhe mësim individual të një instrumenti muzikor nga një kulturë tjetër.

Psh. mësuesja e violinës Johana Udert po mëson tani disa instrumente iraniane. "Unë jam kurioze të shoh se si mund t'i mësoj tonalitetet e tjera," thotë ajo. Këto eksperienca ajo dëshrion t'i përfshijnë më pas në punën e saj edukative me nxënës nga kulturat e tjera.