Anëtarët e Grupit Negociator të Kosovës, janë shprehur se proceset politike në vend duhet të vazhdojnë, ndërsa, ata do të angazhohen që të shtyjnë përpara procesin e bisedimeve për statusin final të Kosovës. Kaloi plot një javë që aktivitetet politike në Kosovë u pezulluan, por e gjithë kjo ishte për të nderuar presidentin e ndjerë, Ibrahim Rugova.

Kryetari i kuvendit të Kosovës, Nexhat Daci: "Procesi do të ecë pa asnjë vonesë, pa asnjë tronditje nga pala kosovare. Ky ishte edhe amaneti i presidentit Rugova. Ky ishte projekti i tij dhe ne nuk do të largohemi nga ai, do të jemi unik dhe do t'a realizojmë."
Kryetari i kuvendit të Kosovës, Nexhat Daci, aktualisht është ushtrues i detyrës së presidentit të Kosovës. Këtë i'a lejon për 45 ditë Korniza Kushtetuese për Vetadministrim të Përkohshëm.

Kryetari i PDK-së, në opozitë, Hashim Thaqi, ndërkaq, thotë se në Kosovë do të ruhet uniteti politik: "Dhe të vazhdojmë angazhimet tona të sinqerta, përkushtimet tona për zbatimin e standaeteve demokratike dhe procesin e zgjidhjes së statusit politik përmes negociatave."

Për unitet në Kosovë, pas vdekjes së presidentit Rugova, shprehet edhe Veton Surroi, anëtar i Grupit Negociator të Kosovës. Ai thotë se aktualisht duhet të angazhohemi maksimalisht në procesin e bisedimeve për statusin final.

Shumë diplomatë evropianë që ishin në Kosovë dhe morën pjesë në ceremoninë e varrimit të presidentit Rugova, porositën udhëheqësit e këtushëm që në Kosovë nuk duhet lejuar që të krijohet boshllëk institucional. Këtë e tha gjatë qëndrimit këtu edhe shefi i diplomacisë gjermane, Frank Valter Shtajnmajer. Udhëheqësit e opozitës në Kosovë, ndërkaq, shprehen se procesi negociator për Kosovën ka nevojë për presidentin e vendit. Ata shprehen të bindur se LDK- ja nga radhët e së cilës duhet të nominohet kandidati për president të vendit do të gjejë shumë shpejt forcë dhe do të përcaktohet për të zgjedhurit e tyre dhe në këtë mënyrë, presidenti i ri i vendit t'i bashkohet Grupit Negociator.