Ministrat e mbrojtjes të NATO-s gjatë konsultimeve në Bruksel shqyrtuan detajet për misionin në Darfur. Kohët e fundit në Bruksel ka pasur grindje lidhur me ndarjen e komptenecave në këtë mision mes NATO-s dhe BE-së. Por Sekretari i Përgjithshëm i NATO-s, Jap de Hop Shefer duke theksuar se njerëzit në këtë rajon kanë nevojë për ndihmë vuri në dukje: "Nëse NATO-ja do të mbështesë BE-në dhe BE-ja do të ndihmojë Unionin Afrikan, atëherë kjo duhet mundësuar."

Edhe ministri gjerman i mbrojtjes Peter Shtruk duke premtuar ndihmën e Bundeswehrit në këtë mision, theksoi: "Mendoj, se të gjithë pjesëmarrësit kanë të njëjtin qëllim për të ndihmuar Sudanin, ndaj nuk ka kuptim që të debatohet për ndarjen e komptencave. E rëndësishme është që të bëhet diçka."

Unioni Afrikan do të rrisë në gjithsej 7.800 ushtarë nga vendet e rajonit trupën e misionit paqësor në Sudan. Ndërsa NATO-ja do të ndihmojë në koordinimin e këtij misioni duke dërguar pesë oficerë në kryeqytetin e Etiopisë Adis Abebë. Dislokim i trupave të NATO-s në Darfur nuk është parashikuar, pasi për këtë nuk është dakord qeveria sudaneze. Transporti i ndihmave nga ajri nën ombrellën e NATO-s do të realizohet kryesisht prej SHBA. Ndërsa Franca dhe Gjermania do të ndihmojnë në kuadër të misionit të BE-së. Tani për tani ende nuk është përcaktuar se kur do të nisë ky mision.

Ministrat e mbrojtjes të aleancës diskutuan edhe për misionet që vazhdojnë ndërkohë në Afganistan dhe në Kosovë. Në Afganistan për zgjedhjet parlamentare të planifikuara të zhvillohen në vjeshtë NATO-ja do të dërgojë ushtarë për përforcimin e trupës. Temë diskutimi në takimin dyditor të ministrave të mbrojtjes të aleancës në Bruksel janë edhe Iraku, çështje që kanë të bëjnë me ristrukturimin e trupave si dhe problemi i armëve bërthamore.