Nga këndvështrimi gjerman Kampionati Botëror i Futbollit për femra nuk ishte ëndërr vere, sepse princesha humbi para kohe. Por, i gjithë turneu mund të vlerësohet pa dyshim si i suksesshëm. Stadiumet ishin të mbushura mirë. Shikuesit e festuan Kampionatin Botëror si festë. Futbolli i meshkujve ka se çfarë të mësojë prej kësaj. Në një pjesë të mirë të turneut ekipet nuk ofruan vetëm zbavitje nga më e mira, po edhe sport të madh në nivel teknik, atletik dhe taktik.

Dallimet janë bërë më të vogla

Gjatë kampionatit ra në sy fakti, që performancat në futbollin e femrave po afrohen njëra me tjetrën. Qoftë Guineja Ekuatoriale, Kolumbia apo Zelanda e Re, edhe vende gjoja të vogla, që pas raundit të parë u detyruan të bënin gati valixhet, u paraqitën mjaft mirë. Kjo i shërbeu turneut. Prej ekipeve të favorizuara disa u eliminuan më herët sesa pritej. Çerekfinalja ishte stacioni i fundit për Anglinë, për Brazilin dhe për Gjermaninë. Edhe në futbollin e grave nuk mjaftojnë më performancat mesatare për të mbërritur në fazat e fundit të Kampionatit Botëror.

Lehtësia mungonte

Duket se ekipi gjerman dështoi para së gjithash prej pritjeve të mëdha. Si vetëkuptueshëm opinioni publik llogariste me fitoren e titullit të tretë me radhë Kampion Bote prej skuadrës së trajneres Silvia Neids. Por lehtësia humbi kur ndeshjet u bënë serioze. Potencialin e vet të vërtetë skuadra e tregoi vetëm në ndeshjen në grup kundër Francës. Trajneres Neid, iu desh me të drejtë të dëgjonte kritikë. Vendimi i saj i diskutueshëm për ta lënë Birgit Prinz në stolin e rezervave, ishte i drejtë. Tri herë futbollistja më e mirë e botës dhe lojtarja rekordmene e ndeshjeve për kombëtaren luajti plotësisht nën formë.

Balsam për shpirtin

Një ngushëllim i vogël: Gjermania u eliminua prej kampionit të mëvonshëm të botës. Japonezet janë një titullar i denjë. Të forta në lojë, të disiplinuara taktikisht, një njësi si skuadër. Kësisoj në fund pati një ëndërr vere: për Japoninë, e cila pas katastrofës së cunamit dhe asaj bërthamore pranverën e kaluar kishte nevojë urgjente për balsam për shpirtin kombëtar të munduar.

Autor: Stefan Nestler/ Elert Ajazaj
Redaktoi: E. Xhani